Nongpoh, Nailur 07: Ka Seng Ri Bhoi Youth Organization (RBYO) kala dawa ia ka Sorkar MDA bad ia u MLA ka thain ba kin phaikhmat bad maramot noh mardor ia ka surok Nongpoh-Umden, kaba la jot rathai bad shu ieh la bun bun snem.
Kane ka seng bala lamkhmat da u President samla Baiateilang Lapang, kala leit jurip ia kane ka surok naduh ka thain Nongpoh Iewmawlong, Marngar, Umwang, Kharpati, Purduwa, Plasha, Umpyrdong, Diwon, Umden bad kiwei kiwei ki shnong.
Ka seng kala pynpaw ia ka jingbynniaw kaba jur namar ki paitbah da ki phew snem ki la mad ia ki jingeh ha ka leit ka wan lyngba kane ka surok khamtam ki khynnah kiba leit skul bad khamtam kiba pang kiba shitom bad kaba sngewsih ba don ruh kiba ym poi shuh sha ka jingsumar lane hospital bad kila duh ruh ia ka jingim tang namar ka jingsniew u surok kaba la palat liam.
La iathuh ruh ba kane ka surok ha baroh shilynter la dap satang da ki thliew ki syar kiba heh kaba la buh jingeh shikatdei ia ki paidbah nongleit nongwan khamtam ki trai kali namar ka jing duh ruh ki kali kaba khah khah ha shiteng lynti.
Halor kine kiei kiei, ka RBYO ka la kyntu ia u MLA ka thaiñ ban pynioh noh ia ka surok kaba bit ba biang bad ban iatai hapoh ka Iing Dorbar Thawain na ka bynta ka jingsuk ha ka leit ka wan u paidbah.
Kala dawa ruh ia ka Sorkar MDA ba kan phai khmat mardor halor ka jingdonkam jong u paidbah khamtam ia kane ka surok ka ba dei u budlum jong ka roi ka par.
