Shillong, Nailar 28 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Balang ula pyntip ba ka Tnad kala pynkhreh ia ka jingtyrwa ban shna pynbha bad pynkhlain ia ki bynta jong ka surok Nartiang-Jonglwit-Barato, kaba la sniew bad khohruh khohram bha.
Haba jubab ia ka zero hour notice bala wanrah da u MLA ka UDP na Mookaiaw Bah Nujorki Sungoh, u Bah Prestone ula ong “Nga kwah ban pyntip ia u dkhot ba ka Sorkar kam shym la shong kli kti hynrei ka dang pynkhreh ia ki kam, ban wad ia ka lynti kaba biang eh ha kaban weng ia ka jingeh bala iakynduh da ki paidbah ka thain Mookaiaw khamtam ha ki bynta jong ka surok Narting-Jonglwit-Barator (na 14th-21 km)kaba la sniew bha”.
“KaTnad kala pynkhreh ia ka jingtyrwa ban shna pynbha/pynkhlain ia kane ka bynta jong ka surok ha kane ka snem mang tyngka 2024-25” ula ong.
Ka surok Nartiang-Jonglwit-Barato (NJB), kaba jrong kumba 35.40 km, ka dei ka surok ba kongsan bha jong ka thain, kaba iaid lyngba kiba bun tylli ki Shnong.
Kane ka surok kala sdang na ka shnong Nartiang bad kut ha ka shnong Barato. Baroh ki shnong ha kine ki thain ki dei kiba la biang ki lad pyniasoh na ka surok NJB shala ki shnong la ka long lyngba ka surok ODR lane ka surok shnong lane ka surok PMGSY.
U Bah Prestone ula ong ba ka surok NJB ka dang biang bha lait noh tang kumba 7 km kaba la sniew kata naduh 14 km haduh 21 km kata naduh Takhniang sha Shilliang Myntang.
Ula ong ba ka surok na Madan Takhniang sha Thadbamon kaba jrong kumba 3 km eiei, ka dei kaba lah ban iaid kali hynrei kala sniew bha. Hynrei, ka Tnad kan sa shimkhia ban maramot ia ki bynta jong kane ka surok hadien bala kut ka lyiur.
Ia ka surok ba jrong kumba 9.20 km kaba pyniasoh sha Thadialong-Thadbamon-Musiaw-Latymphu ka dei kaba la pyntrei na ka PMGSY scheme bad kane ka surok ka dei kaba la dep pyntrei bad ka dang bha bha.
Lah ban kdew ba kiwei pat ki bynta jong ka surok ruh la pyntrei mynta na ka PMGSY-III batch-I kum ka surok na Raliang sha Sahsniang ba jrong kumba 21 km.
Kumjuh ruh ia ka surok Laskein sha Barato ba jrong kumba 16.20 km ruh la pyntrei na ka PMGSY III-Batch-I bad ka kam ka dang iaid shakhmat. Ia ka surok Pasyih-Garampani na ka bynta ba 21 km shaduh ka 48 km ka dei kaba dang bha, ula bynrap.
kaba la sniew bha”.){kind=link}