Agartala, Naitung 14 : Ha ka jingpyni ia ka dak jong ka jingiajan, u Myntri Rangbah (CM) ka Tripura u Dr Manik Saha u la phah ka jingai sngewbha da 750 kilo u Sohtrun ba la tip kum u Kew pineapple sha ka Myntri Rangbahduh (PM) ka Bangladesh ka Sheikh Hasina, kata hadien ba kane ka myntri ruh ka la phah da ki soh ha kine ki khyndiat taiew ba la dep.
Ka tnat Horticulture ka Tripura ka la phah ia kine ki soh ha ka jingiadon lang ki heh sorkar hapoh Akhaura Integrated Check Post hynne ka step sngi Palei.
Kham hashwa, ka PM Hasina ka la phah da ki Sohpieng Amrapali ba pawnam jong ka ri sha u CM ka Tripura u Dr Manik Saha lem bad kiwei pat ki heh sorkar kum ka dak ban pynpaw ia ka jingiadei ka ba jan.
Ha ba kren halor kane ka phang, u Assistant Director ka Tripura Horticulture Department u Dr Deepak Baidya u la ong , “Ia kine ki soh ki ba paka tam la phah sha Bangladesh mynta ka sngi.Ngi kyrmen ba kane kan nang pynkhlain shuh shuh ia ka jingiadei hapdeng ka Tripura bad ka Bangladesh.”
Nalor kata u la ong ruh ba ka sorkar Tripura ka don ia ka jingangnud ban shalan Sohtrun shapoh Bangladesh.
