Shillong, Nailur 24 : Ka Pnar Student Movement (PSM) kala dawa ia ka Sorkar Jylla ba kan pynim biang mardor ia ka Anti-Infiltration Directorate Check Gate ha surok Jowai-Dawki namar ka jingjur ka jingrung tuh ki nong Bangladesh na ki thain Dawki.
Ha ka dorkhas sha u Symbud Myntri Rangbah ba khmih ia ki kam Pohiing Bah Prestone Tynsong, u President ka PSM samla Embhah Passah ula ong ba ka khappud Bangladesh kala suk bha ban rung tuh ki briew hadien ba la pynpraw noh ia ka check gate kaba ju talasi ia ki kali bad peitthuh ia ka leit ka wan ki briew.
Ka kynhun kala kam ba ki nong Bangladesh kila pyndonkam ia ki jaka ba suk ban prong tuh n aka thain Dawki ban rung beain, kaba buh ha ka jingeh ia ki bor pynjari ain bad buh jingma ia ka imlang sahlang bad ka kamai kajih nalor ka jingshngain jong ki trai ri trai muluk.
Ka dawa ia ka Sorkar ban buh biang ia ka check gate kaba treikam pura ha ki jaka kiba kongsan jong ka Highway khlem da pynslem shuh, mang bad thungkam ia ki briew ki ban pyntreikam ia ka ain, bad pynkhlain ia ka jingpeit pyrman da ki Pulit, ki bor district bad ki bor syntiat ha ki surok, lynti iaid kjat bad ki rud wah ha ka thain.
Haba maham ba ka jingbym leh eiei kan pynbor ia ki samla ban shim ia ka lynti jingiakhih ban iada ia la ka Ri, ka PSM kala ba ka jingiada ia ka khappud kam dei ban shu ieh khlem peit.
