Guwahati, Naitung 14: Ha ka jingjia ka ba sngew shyrkhei, kawei ka longkmie la kynnoh ba ka la shah pyniap noh ha la ki jong ki kiaw ki kthaw kurim namar ba ka la kha da i khun kynthei.Kane ka jingjia ka la jia ha ki bynta jong ka thain Bhairabnagar hapoh Karimganj district ka Assam.
Katkum ka kaiphot, kane ka longkmie la kynnoh ba ka la khlad noh hadien ba ka la shah pynbor ha la u kurim bad ki kiaw ki kthaw ba kan dih ia ka acid.Ia kane ka lanot la tip kyrteng kum ka Sumna Begum.
Katkum ka jingiathuh da ki trai shnong, kane ka briew ka la shah pyniap noh ha la u jong u kurim bad ki kmie ki kpa jong u namar ba kam shym la kha da u khun shynrang kumba ki la angnud.
Hadien kane ka jingjia, une u kurim ia u ba la tip kyrteng kum u Shakeel Ahmed u la shah kem noh ha ki bor pulit na ka bynta ban pynlong ka jingtohkit.Ia kane ka lanot la pynkit noh mardor shapoh ka hospital ka ba don marjan, hynrei ka la khlad noh hapdeng ka jingshah sumar.
Ha kawei pat ka jingjia ha Assem, iwei i khunlung i la khlad noh na ka jingkynnoh leh thurmur jong ki doktor hapoh Fakhruddin Ali Ahmed Medical College and Hospital (FAAMCH), ha Barpeta.
Ka longkmie armet ka ba kyrteng ka Dharitri Nath 22 snem rta, ka kurim jong u Mantu Nath ki ba dei na ka shnong Soruharid kaba hap hapoh Sarbhog police station ha Barpeta district ki la leit shah sumar hapoh katei ka hospital ha ka 6 tarik mynta u bnai.
Katkum ka jingujor da u kurim jong ka, la ong ba u doktor u la shu pynap sah ia ka na ka bynta ba kan lah ban kha hi ia i khunlung wat haiden ka jingshitom ka ba jur.Ki ba haiing jong ka ki la iai kyntu ia une u doktor bad ki nos ba kin shu puid noh, hynrei na ka liang une u doktor um shym la patiaw satia.
