Aizawl, Naitung 14: Ki dkhot jong ka Mizoram Youth Congress ki la pynlong ka jingiakhih hakhmat ka secretariat ha Aizawl ban dawa bai lutksan na ka bynta ki ba haiing hasem jong ka longkmie 52 snem rta ia ka ba la kynnoh ba ka la khlad noh hadien ka jingwan khynra jong ka tnat excise bad ka tnat narcotic ka ylla ia ka dukan die grape wine jong ka.
Ha ka sngi ba Ar ba la lah, ki samla Congress ki la phah ruh ia ka jingthoh sha u Myntri ka tnat excise u K Beichhua ban dawa ia ka bai lutksan ka ba T. 1 klur na ka bynta ki bahaiing hasem jong ka Lalhriatpuii, ka ba ka jingiap ba dang shen jong ka la kynnoh ba ka don jingiadei bad ka jingshah ktah ka koit ka khiah namar katei ka jingshah khynra bad ka jingshah kurup ki jingdie (grape wine) ki ba la kot sha ka T.22 lak.
Ha kane ka jingthoh ka party Congress ka la dawa ruh ia u myntri ka tnat excise bad narcotics u K Beichhua ba un hiar shuki noh halor ka nongrim jong ka jingsngew briew. U president ka youth Congress u Lalmalsawma Nghaka u la ong ba ki nongtrei ka party hynnin ka sngi balang ki la ialum lang hakhmat ka ophis jong utei u myntri hapoh ka secretariat ka sorkar jylla ban dawa na ka sorkar ba kan siew bai lutksan sha ki ba haiing hasem jong katei ka longkmie.
U la ong ruh ba ki la dawa na utei u myntri ba u dei ban pan map halor ki jingkren ki jong u hakhmat ki lad pathai khubor ha ka ba iadei bad kane ka jingkurup noh ia ki bilor wine nalor ka jingai jingiairap sha ki ba haiing hasem ki jong ka.
U Nghaka u la kynnoh ba u Beichhua u la kam ba ha katei ka jingkhynra ki la ioh ruh ban kurup ruh ia ki bilor kyiad (whiskey) nalor ki bilor wine grape na ka dukan jong ka Lalhriatpuii ha ka por ba u la aijingkren sha ki katto katne ki lad pathai khubor.
Hynrei, ka jingshisha hi u Nghaka u la ong ba ym shym la ioh kurup wat tang uwei ruh u bilor whiskey na katei ka dukan, kata katkum ka list ba la ioh kurup da ka tnat excise.Ka Congress kan dang iai bteng ban pynlong ia ka jingiakhih halor kane.
“Ngim pat shym la ioh kano kano ka jubab ka ba biang na utei u myntri mynta ka sngi Palei. Ngin dang bteng ia ka jingiakhih. Ngin dawa ruh ia ka jingiehnoh kam ka jong u lada u pulom ban pan map bad siew bai lutksan sha katei ka lanot,” ong u Nghaka.
Na ka liang u Beichhua u la kyntait ban pynpaw ei ei halor kane ka mat. “Nga tharai kane kam dei ka por ka ba biang ban pynpaw ei ei halor kane ka phang namar ka dang don hapdeng ka jingiakynad.Nga kyrmen ba ka hok kan sa paw ha ka ba khatduh,” ong u myntri.
Ki tyllong khubor na ki ba haiing hasem jong katei ka longkmie ba la khlad ki la ong ba ka Lalhriatpuii ka bym don shuh u kurim ka la pyniaid ia ka dukan grape wine hapoh ka dukan (shopping mall) ka ba heh tam hapoh Aizawl ka la khlad noh na ka jingpang stroke ha kane ka sngi Nyngkong ba la lah hadien ba la pynkit ia ka shapoh Aizawl na Guwahati.
