Shillong, Naitung 14: Ka HYC Mawlai circle mynta ka janmiet 14 tarik Naitung 2023 hapoh ka jingialam u Shipai S. Marwein ka la leit sha ka shnong Mawlai Umshing Mawkynroh ban pynher krad ia kumba 16 ngut ki bar jylla lyngba ka SIER LAPALANG OPERATION (SLO) kiba wan trei wan ktah ha katei ka shnong.
Haba iakren bad utei u nongialam, u la ong bun ki samla bylla na Mawlai ki hap ban leit trei shaduh ki thain Upper Shillong, Laitkor, Ri Bhoi, bad jngai na la shnong namar ba kim ju ioh bylla shuh na Mawlai ha Mawlai. Hynrei ka long kaba kyndit ban iohi ba kine ki bar jylla pat na kiwei ki Jylla ki ioh ban trei ban ktah hapoh ka shnong Mawlai.
Kumta kum ka jingpyrkhat lem na bynta ki nongbylla ka shnong Mawlai, kiba ha jaka ban pynlut bai kali bun haba leit bylla shabar, mynta kin pynlut noh tang khyndiat, lada ki trei na Mawlai ha Mawlai.
Ka seng ka shim ia kane ka jingpynher krad SLO, kum ka dak ban plie ia ki nongbylla ne ki misteri kiba na ka shnong Mawlai.
U la ong ka seng ka phah de ka kyrwoh sha baroh ki trai iing ne ki contractor ba nangne shakhmat, sngewbha buh da ki nongbylla khasi ha ki jingtrei jong phi, lem kumta, ka seng kan iai bteng ia ka SIER LAPALANG OPERATION hapoh ka shnong Mawlai.
Kane ka long katkum ka kyrwoh ba la pyllait da u General secretary Shipai B. Lyngdoh Mawnai.
