Shillong, Naitung 14 : Ka sorkar jylla ka dang bishar bniah mynta ia ka jingtyrwa ban don noh sa kawei ka battalion ba thymmai na ka bynta ban pynkhlain ia ka jingtreikam ka tnad pulit ha ka jylla.
Na ka liang u Myntri Rangbah ka jylla Conrad K Sangma haba kren bad ki lad pathai khubor ha ka sngi Balang u la iathuh ba katei ka jingtyrwa la ia kren ha ka rynsan ia syllok bad ki Superintendent of Police jong ki distrik bapher bapher bad ruh ki Commandant.
U ong ruh ba kane pat kan don ka jingktah kaba jur ia ka pla tyngka na ka bynta ban pynmih thymmai sa kawei pat ka battalion ha ka jylla.
“Kumta, ngi hap ban da bishar bniah ia kane ka kam bad ka jingiakren ka sang iaid shakhmat hynrei ngim pat shim ia ka rai ba khatduh halor kane, ” u la ong.
Na ka liang ka tnad pulit ka la pynpaw ia ka jingsngew baa donkam noh ban kyntiew noh ia ka battalion sha kaba hynniew bad sha kaba phra na ka bynta ban pynkhlain ia ka jingtreikam ka tnad.
Dang ha u Jylliew jong u snem ba la dep, u Myntri Rangbah ka jylla u la ong ba ka sorkar pdeng kan hap ban kyrshan ia ka jylla haba iadei bad katto katne percent na ka bynta ban kyntiew shuh ki battalion hynrei hadien shisnem, tangba ka jingktah ha ka liang ka pla tyngka kan hap beit ha ka sorkar jylla ban pyntyllun.
“Ia kaba mynta ka jingpynlut ha kaba sdang kam dei kaba da heh lada nujor bad ka jingpynlut kaba kyllum ha ki 15-30 snem ban wan, kumta ngi hap ban bishar bniah ha baroh ki liang, ” u la bynrap biang.
