Shillong, Naitung 14: Ka Harijan Panchayat Committee (HPC) hynne ka sngi palei ka la pyntip ba kan ap ia ka blueprint ka ban kdew shai ia ka jingtyrwa ka sorkar halor ka jingpynkynriah ia ki 342 tylli ki longiing na Them Metor hashwa ba Jan shim ia ka rai.
“Ngin sa peit ynda ka sorkar ka khot ia ngi bad aiti ia ka kaiphod ha ka dur Jong ka blueprint. Ha kane ka por ngin sa khmih bad ngin sa iakren bad ki briew ba sah ha Them Metor bad ban shim rai la ngin pdiang ne em” ong u Gurjit Singh haba iakren lyngba ka phone.
Ia kane la pynpaw ruh shisngi hadien ba la pyntip sha ka iingkashari Meghalaya High Court ba ki bor sorkar kila dep pynkhreh ia ka blueprint ban aiti ia 3 acre ka jaka hajan RP Chest Hospital ban tei ia ki iing bun mala ban pynsah ia ki briew na Them Metor.
Hynrei u Gurjit ula ong ba bun kynthup ki Rangbah Shnong, Sengbhalang bad u MLA Mohendro Rapsang kila pynpaw ia ka jingpyrshah ia kane ka jingthmu ai jaka ka sorkar hajan ka RP Chest Hospital.
“Ka Sorkar ka tip lut bad u Symbud Myntri Rangbah ruh ula dep kren ia u MLA ban sa wad jaka ruh shawei hynrei mynta kila pyntip sha iingkashari ba ka sorkar kala dep ithuh ia ka jaka. Ta ka daw kam long shai satia” ula ong.
Shuh shuh u la pyntip ruh ba ha ka 25tarik u Iaiong ka HPC na la mynjur ban kynriah noh na katei ka jaka halor ki kyndon ba ka sorkar jylla kan ai ia ka jaka ba 200 square meter marwei marwei sha ki 342 tylli ki longiing hapoh European ward nalor ban siew ruh ia ka bai shna ia ki Ïing ki sem jong ki.
“Hynrei ka jaka (hajan RP Chest Hospital) kma dei satia ha European Ward. Kumta, ngin hap ban sa ia kren biang namar katkum ka rai jong ka Society ngi dawa ka jaka ba kan dei ha European Ward,” ong u Singh.
Shuh shuh u ong ruh ba ka jingpyrshah na u MLA bad ruh na u Rangbah Shnong jong ka thain, ka tnad Urban Affairs ka la rai ban jied sa ar ne lai tylli ki jaka ban pynkynriah ia ki, ia kaba kin sa kdew ha ka blueprint.
U tei u secretary ka HPC u la pynpaw ruh ia ka jingbynñiaw halor ka jingpynslem jong ka sorkar ban wanrah ia ka blueprint.
“Ki shim por namar mynta la jan ka el3kshon bad kumta kin sa pyrshang ban iehteng shwa ia kane ka ishu namar lada bakla kin sa shah rem,” u la ong.
