Shillong, Naitung, 15: U MLA ka West Shillong Constituency Bah Mohendro Rapsang ula pynpaw ia ka jingpyrshah ia ka jingthmu jong ka Sorkar Jylla ban ithuh ia ka jaka hajan jong ka RP Chest Hospital ban pynsah ia ki 342 tylli ki Longiing ba pynkynriah na Them Metor, Iew Mawlong.
Une u MLA uba la iakynduh ia u Symbud Myntri Rangbah hynnin ka sngi palei, ula ong ba ha ka jingialang ba nyngkong jong u bad u Symbud Myntri Rangbah, la pyntip ha u ba ka Sorkar ka dang wad ia ka jaka.
“Mynta ka sngi nga la iohi iaka khubor ba ka Sorkar kala dep aiti ia ka kaiphod sha ka Iingkashari High Court, ka jingkylli kaba mih mynta ka long hato ka Sorkar kala ithuh ia ka jaka ha TB Hospital kum ka jaka sah ba shirta jong ki harijan ne ka dei tang ka jingtyrwa kaba ngi dang ap ban tip” ula ong.
U Bah Rapsang ula ong ruh na ka liang ka jong u,kum u MLA lem bad ka Dorbar Shnong, kila pyrshah jur ia kane ka jingthmu jong ka Sorkar.
Une u MLA ka West Shillong ula ong baka jingpyrshah hi ka long namar ba kane ka jaka kala dei lypa kaba la khapngiah bad bun paid bha bad ka jingwanrah sa kawei ka colony ha ka thain, kan sa nang kynton ia ki jingeh.
“Ta ka daw ngim kwah ia kata, ngim don jingpyrshah satia ia kino kino ki briew kiba dei na kino kino ki colony, ka jingeh hi ka long ba kane ka jaka ka dei kaba la khapngiah da ki nongshongshnong” ong u Bah Rapsang.
Une u MLA ula ong ba kawei pat ka daw ka dei namar kane ka jaka ka dei kaba la thmu na ka bynta ka hospital, ban sumar ia ki paidbah ym ban pynkylla colony.
Haba ieng skhem ban pyrshah, u Bah Rapsang ula ong ba dei halor kine ki nongrim ba kila pyrshah ia ka jingthmu jong ka Sorkar.
Une u MLA ula rai ruh ban sa iakynduh biang ia u Symbud Myntri Rangbah Bah Prestone Tynsong namar dei u Bah Prestone uba khlieh ia ka High Level Committee (HPC).
U Bah Rapsang ula pyntip ba ha kane ka kynti, yn sa synran ia u da ka Dorbar Shnong jong ka thain, ban kyrpad ba kane kam dei satia ka jaka ban pynsah ia ki 342 tylli ki Longiing kiba pynkynriah na Them Metor.
