Nongpoh, Nailar 19: “Ban shakri ia la ki parabriew ka dei ka jingshakri ia u Blei Trai Kynrad”, pynpaw u Sherrad Wahlang, u khun ka Victoria Wahlang, ka trai jong ka Kripa Victoria Senior Citizen Home, ka jaka ri sumar ia ki riew tymmen ba dang shu plie hynne ka sngi.
Ka Kripa Victoria Senior Citizen Homes ka dei kawei na ki jaka ri sumar ïa ki riew tymmen kaba nyngkong eh ha ka jylla kaba la lah ban seng hi da ka riew shimet, kata da ka Kong Victoria Wahlang hakhmat ka ICAR, Umroi Nongsder, Ri Bhoi District.
“Kum u khun nga dap da ka jingkmen kaba khraw ban lah pynurlong ïa ka jingangnud I Mei jong nga, iba thrang dikdik ban ai jingshakri ïa ki riew tymmen kibym don shuh ki nongri nongsumar ha la iing la sem” ong u Bah Sherrad.
Na ka liang i Kong Victoria Wahlang haba kren bad ki Nongthoh Khubor, ila pynpaw ïa ka jingkmen kaba khraw ban ïoh ïa kum kane ka lad ban seng ïa kane ka jaka ri bad sumar ïa ki riew tymmen ki bym don nongsumar shuh ïa ki, da kaba kdew ruh, ba kane ka dei ka jingphohsniew kaba la kham slem hadien ka jingleit jngoh jong i ïa ki jaka ri sumar ïa ki riew tymmen shabar ka ri bad ruh hapoh kane ka ri India.
I la pynpaw ruh, ba ha kane ka jaka ki don ruh ki jaka sah pyngngad na ka bynta kito kiba kwah ban wan sahkai ha kaba lyngba ka jingsiew jong kito kiba wan sah ha kine ki iing, yn lah pat ban pynbit pynbiang ïa ki jingdonkam baroh na ka bynta ka jaka ri sumar ïa ki riew tymmen bad kiwei kiwei ki jingdonkam baroh.
La wan ban plie ïa kane ka jaka da u Fr. Joe Pereira, u ba dei u nongseng ïa ka Kripa Foundation, Trustee kum u kongsan ha ka jingïadonlang ruh ka Kong Rosetta Mary Kurbah, Secretary jong ka tnad Health & Family Welfare, ka Kong Emy Kharchandy, District Social Welfare Officer ka Ri Bhoi District nalor kiwei kiwei.
Na ka liang ki nongkren baroh, ki la ai ïa ka jingïaroh kaba khraw ïa i Kong Victoria Wahlang kum ka longkmie iba ïohi jngai bad iba angnud shisha ban shakri ïa la ki para briew .
