Nongpoh, Nailar 19: Ki nongïalam ka Hynniewtrep National Youth Front (HNYF), Northern Region mynta ka sngi ki la dawa ia u Myntri Rangbah ka Jylla bad ka Sorkar Jylla ba ka dei ban khein kor bad sngap ruh ïa ka sur jong u paidbah nongshong shnong hashwa ban shim ïa ka rai ban pynbeit ïa u pud u sam ba tikna hapdeng ka Assam bad Meghalaya ha kane ka kynti ba mynta.
Haba iakren bad ki Nongthoh Khubor ha Nongpoh, u President Bah Marcus Marten u la ong ba kane ka jingdawa kala mih namar shen ka sorkar Assam bad Meghalaya kin sa sdang biang ïa ka jingpynbeit pud jong ka wat ba-ar ban pynbeit sa ïa ki 6 tylli ki jaka kiba don ka jingïakynad pud.
“Ka seng ka la pynmih ïa kane ka jingdawa namar ka sheptieng ioh ka sorkar Meghalaya kan sa hun ban aiti bad pynhap ïa kiba bun tylli ki shnong sha ka Assam halor ka nongrim ba kitei ki shnong ki dei kiba shong shnong da ki briew kiba dei na kiwei pat ki jaidbynriew”, ong u Bah Marten, da kaba bynrap, ba ka sorkar Meghalaya kam dei ban khein sting halor ka hok nongkynti ïa kitei ki jaka kiban sa shim ïa ka rai hadien ka jingjurip ban pynbeit ïa ki.
U Bah Marten u la kdew shai, ba ka sorkar jylla ka dei ban ïakhun tyngeh ban pynneh pynsah ïa ki jaka kiba hap hapoh ka Raid Nongtung kaba ju tip kum ka Block II hapoh ka Meghalaya namar ba bun ki nongshong shnong ki dei ki khasi khara bad ruh kiba angnud ban shah kynthup beit hapoh kane ka jylla khamtam ïa ki jaka ki puta.
Ha kawei ka liang, na ka liang ka HNYF, Northern Region ka la pynpaw ruh ïa ka jingpyrshah kaba jur halor ka jingthmu ban wanrah ïa ka ktem ïa khalai (Casino) hapoh ka them Ri Bhoi District da kaba kdew, ba kane ka ktem ïa khalai kan pynjot pynpra ïa kiba bun ki longiing longsem bad ruh kan kjit lut ïa ka ïoh ka kot jong ki paidbah nalor ka jingpynthoh bria ïa kane ka district.
