Guwahati, Nailar 20 : Phra ngut ki lehnoh kiba dei na ka kynhun kieng atiar Kuki Tribal Union (KTU) kila wan ban pyndem noh ia lade hakhmat ki heh shipai ka Assam Rifles hapoh ka ktem shipai ha Sarkari Bagan ha Haflong, Dima Hasao district ka Assam hynnin ka sngi Thohdieng.
Ki heh shipai kila pynpaw ba na ka liang ka tnat Assam Rifles kala lah ban pynsngewthuh ia ki lehnoh KTU kiba donkti ha ki kam pyntriem bad ha ki kam lum pisa jubor na ki paidbah ha ki jylla bapher bapher jong ka thain Northeast ba kin wanphai pat sha ka lynti kaba dei.
Ki tyllong khubor ki iathuh ba kine ki phra ngut ki lehnoh kiba la wan ban pyndem noh ia lade, ki dei na ka kynhun kaba iapait na ka kynhun seng lehnoh Kuki Revolutionary Army (KRA) bad leit ban pyniasoh bad ka KTU ha une u snem ba la dep.
“Kane ka kynhun ka kham treikam tang ha ki jaka kiba bun ki jaidbynriew Kuki jong ka Nagaland, Manipur bad Dima Hasao ka Assam bad ha Karbi Anglong district.
Kane ka kynhun seng lehnoh kala sdang ban lum khajna hapoh ki jaka jong ki trai shnong Kuki hapoh Jiribam bad Tamenglong,” ong u heh ka tnat syntiat.Kine ki lehnoh ki dei ruh kiba don ia ka jingiadei kaba jan bad ka NSCN-IM bad kiba la ioh ruh ia ka jinghikai na kane ka kynhun seng lehnoh Naga.
Hadien katei ka jingpyndem wait, la pynkynriah noh ia kine ki lehnoh shapoh ka police station ha Haflong na ka bynta ban pyndep ia ki jingdonkam baroh.
Katkum ki heh sorkar na ka tnat kam pohiing ka Manipur, la iathuh ba ki don haduh kumba 20 tylli ki kynhun seng lehnoh Kuki kiba treikam hapoh Manipur, kata hapoh ki artylli ki kynhun, kata ka United People’s Front (UPF) bad ka Kuki National Organisation (KNO) kiba la iasoi ia ka soskular ban sangeh ia ki kam pyntriem bad ka sorkar Manipur kumjuh bad ka sorkar pdeng ha ka snem 2008.
Haduh kumba 2000 ngut ki dkhot jong ki kynhun seng lehnoh bapher bapher ka ba kynthup ia ki seng lehnoh Kuki kila don hapoh ki 14 tylli ki ktem sah shipor ha ki bynta bapher bapher ka Manipur.
