Shillong, Nailur 12: Da ka thong ban pynjanai shuh shuh ia ka jingshakri ha ka Koit ka khiah na ka bynta ka thain Sohra, ka FKJGP Central Body ha ka sngi Saitjaiñ ka la pyllait paidbah da ka kali kit nongpang bad aiti ha ka FKJGP Sohra Circle ban pyniaid ia ka.
Ia katei ka kali kit nongpang la pyllait paidbah da u President barim ka FKJGP Bah Welbirth Rani ryngkat ka jingdonlang u President Bah Dundee Cliff Khongsit kumjuh ki nongialam shnong.
Katei ka jingpyllait paidbah ia ka ambulance kadei ruh shi bynta ka jingrakhe ia ka jingdap 10 snem ka jingshakri jong ka FKJGP Sohra ha ka thain.
Haba kren ha ka jingialang u Bah Welbirth u la ong ba kum ka seng ka khmih lynti ba katei ka ambulance kan ai ia ka jingshakri kaba paka ia ki paidbah ha ka pang ka shitom bad ruh ha ki jingjia ba sngewsih.
“Ka ambulance kadei tang ka tiar kumta lada jia eiei kaba bakla ym dei satia ka ambulance kaba leh hynrei dei kito kiba pynïaid ia ka ban shim ka jingkitkhlieh,” u la ong.
U bah Welbirth u ong ruh ba kim kwah ruh ban ïohi ba ka ambulance kan kylla long pynban ka kali kit tiar kit tar.
U Bah Dundee pat ha ka jingkren u la ong ba ki don ka jingkyrmen ba ka FKJGP kan lah ban pyniaid bha ha ka rukom kaba dei ia katei ka kali kit nongpang namarba ka seng ka don ia ki nongkitkam kiba shemphang suda.
La ioh ruh ka jingkren na ki nongialam shnong kumjuh na u President bad Secretary jong ka Seng.
Hadien kane u Bah Dundee u la plie ruh ia ka phutbol ba pynïaid da ka FKJGP.
