Shillong, Naiwieng 30: Ka Baroda kala pynrem noh ia ka jylla Meghalaya hynne ka sngi Saitjain da ka Innings bad 217 run ha ka jingiakhun ha ka U-19 Men’s Cooch Behar Trophy kaba la long ha MCA Ground, Polo.
Haba ka Baroda kaba la kamai 608 run bad hap tang 6 wiket kala rai ban ailad noh ia ka Meghalaya ban tied ha ka sien ka baar bad ka Baroda kala tam da 430 run ia ka Meghalaya kaba la kamai 178 run ha ka First Innings.
Mar ia sdang ka jingialehkai ki 3 ngut ki nongtied ka Meghalaya kila out hapoh jong ka 3 over bad kim shym la lah ban kamai tang 1 run ruh bad kine kila shah pynhap ha u Het G Patel uba la ioh khur 5 wiket ha kane ka jingialehkai.
U Kapten ka Meghalaya u Dipankar Baruah ula ioh 32 run bad u Gaurav Narleng ula ioh 46 run bad kine ki arngut kila lah ban neh slem bad kila kamai lang 63 run.
Hadien kane u Kshitij Singhania ula ialehkai bha bad tied haduh ban da kut hynrei ym shym la ioh ia ka Century bad ula kamai 94 run khlem out, katba u Shavian Blah ula kamai 29 run.
Ka Meghalaya kala kamai 213 run bad hap lut ki nongtied ha kane ka sngi balai jong ka jingialehkai.
Ka Baroda kala jop mynta 4 sien ha ki jingiakhun ki jongka ha ka Elite Group A katba ka Meghalaya pat kala mad iaka jingrem ha baroh 4 sien ha ki jingiakhun.
Ka Meghalaya kan iakhun pyrshah ia ka Karnataka naduh ka 6 tarik u Nohprah ha Bangalore.
