Shillong, Kyllalyngkot 19: U President ka Meghalaya Cricket Association Nababrata Bhattacharjee ula leit jurip ia ka Alotgre Cricket Ground ha Tura, ka madan ka ban ialehkai hapdeng ka Meghalaya pyrshah ia ka Bengal naduh ka 25 tarik u Kyllalyngko jong ka U-23 Men’s Col CK Nayudu Trophy.
U Naba Bhattacharjee ula leit jurip ia kane ka madan bad iatai sani ha kaba iadei bad ka jingpynkhreh na ka bynta katei ka jingialehkai, kaban long ka jingpynshlur bad kan kyntiew ia ka jingialehkai Cricket ha rilum Garo namar ka jingialehkai kadei syndon ka jingthaw iaka histori ha kaba ha kasien kaba nyngkong eh yn pynlong ia ka jingialehkai Cricket jong ka BCCI ha rilum Garo.
Ki heh jongka Tura District Cricket Association kila ai ia ki jingtip kiba bniah ia ka jingiaid shakhmat jong ka kam haka jingialang kaba kynthup ruh ia ka jingling ka madan ialehkai bad kiwei kiwei ki jingtei kiba donkam.
U Naba ula iaroh ia ka jing treishitom jong ki heh ka TDCA, kiba khmih bad sumar ia ka madan bad ula pynpaw ba ula iasaid tyngeh ban pynioh ia ka Tura ban pynlong ia katei ka jingialehkai Cricket bad hadien ula ioh ia ka jingkular na u BCCI Honorary Secretary ba ia katei ka jingialehkai yn pynlong ha lynti kaba shongkun bha.
U Nongialam ka MCA ula pynpaw ia ka jingskhem jingmut ba ka jingpynlong ia katei ka jingialehkai kan long kaba jop bad kaba iaid beit katkum ki jingdonkam baroh bad ula kyntu ia baroh ban iatreilang bad iasnohkti lang ban pynlong ia katei ka jingialehkai ka BCCI ha madan Alotgre kaba jop khnang ba kane ka madan ialehkai kan long syndon ka madan kaba pura kaba ka BCCI kan ai jingithuh ban ioh pynlong ia ki jingialehkai Cricket.
