Shillong, Nailar 04: U Myntri Rangbah ka Jylla Conrad Kongkal Sangma hynne ka sngi palei, ula ong ba ka Sorkar Jylla kan sa shong bishar la ka donkam ne em ban mynjur da ka Resolution ban pynthikna ia ka jingbym shah shuh ban tih ia u Uranium hapoh ka Jylla Meghalaya.
“Ngi khlem pat shong bishar ia kane hynrei ngin sa bishar ia ka bad ngin sa shim ia ka sienjam ba donkam” ong u Conrad haba iakren bad ki lad pathai khubor.
Dang shen, ki Sengbhalang kila dawa ia ka Sorkar Meghalaya Democratic Alliance ban mynjur da ka Official Resolution hapoh ka Iingdorbar Thaw Ain ba kyrpad ia ka Sorkar India ban khylliap noh ia ka jingtyrwa ban tih uranium naka Jylla.
Ha ka sngi ba-ar, u Symbud Myntri Rangbah ka Jylla Bah Prestone Tynsong ula ban jur ba ka nongrim jong ka Sorkar MDA hi ka long ban nym shah ia ka jingtih Uranium napoh ka Jylla.
“La ka dei ka Cabinet ne ki 60 ngut ki MLA, ngi pyrshah jur ia ka jingtuh Uranium. Ka nongrim jong ngi ka long kaba shai bha, la phi mynjur da ka Resolution ne em, nga iathuh ha phi ba katba ka dang don ka sorkar MDA, ngeit ia nga ba ngim ym shah ia ka jingtih uranium ba kan wan jia hapoh ka Jylla” ong u Bah Prestone.
Ha kajuh ka por, ka Atomic Minerals Directorate (AMD) ka North East Region, Shillong ha ka sngi balang kala iathuh ba kam shym don satia kano kano ka jingthmu naka Sorkar India ban pyniaid shakhmat ia ka kam tih uranium na Meghalaya.
Ia kane la pyntip da u Regional Director Dr P Kumar ha ka jingiakynduh bad ka kynhun ki Nongialam ka Hill State People’s Democratic Party (HSPDP.
“U Dr Kumar ula iathuh ha ngi ba kam don satia kano kano ka jingthmu ban tih uranium hapoh ka Jylla. Ia mynta hi, ka Meghalaya ka don shabar ka thup jong ka AMD ha ka thain Shatei Lam Mihngi. Ka AMD ka dang wad ia une u marpoh khyndew kum ha Assam, Arunachal Pradesh, Mizoram bad kiwei kiwei” ong u Bah KP Pangniang, President ka HSPDP.
