Hap hiar ki Pulit ban pynjai jai ia ka jingkulmar
Nongpoh, Nailar 04: Ki Kynhun Sengbhalang na Ri-Bhoi District hynne ka sngi palei, kila leit ban khang khyrdep biang shipor ia ka Toll Plaza (khyrdop lum khajna) jong ka National Highway Authority of India (NHAI) ha Pahammawlein, Ri-Bhoi namar ka jingmutlop ia ka jingdawa ban wengkam mardor ia u Manager u Gagar Rahman.
Kine ki kynhun Sengbhalang ki kynthup ia ka United Hynñiewtrep Movement (UHM), the Confederation of Ri Bhoi People (CORP) bad ka Meghalaya People Social Organization (MPSO) bala ialam da u Bah Rainbow Rony Jyrwa Chairman ka UHM, u Bah Markus Makri, Secretary ka CORP, ka Kong Meralna Ryndong nongïalam ka MPSO lem bad kiwei.
Kane ka jingleit tur jong ki Sengbhalang bad khang khyrdep ia kane ka khyrdop ka dei kaba la jia mynta la arsien arwat, kaba la jia ruh halor ka jingdawa ban wengkam mardor ia u Manager kane ka khyrdop u Gagar Rahman.
Ka jingdawa ban wengkam mardor ia u Gagar na kane ka khyrdop kala jia naduh ki khyndiat bnai bala leit noh halor ki jingkynnoh ba u leh heh leh meng bad wengkam jubor khlem daw ia ki Nongtrei jong kane ka khyrdop kiba dei ki Khasi. La kynnoh ruh ba une u briew ula pyni ruh ia ka jingleh meng bad jingbym khein snep wat ia ki bor pyniaid shnong ka Pahammawlein.
Haba ioh jingtip ia kane ka jingjia, ki Pulit ha ryngkat ki majistor kila hiar bran bran sha kane ka jaka ban iakren bad pynjai jai ia ki dkhot Sengbhalang khnang ba kan nym mih kano kano ka jingjia ba sngewsih.
Ka jingjai jai jong ki Sengbhalang kala wan hadien ba ki Majistor kila kular ban sa phah wan mih ia u Manager ban iakren bad ki Sengbhalang halor ka jingdawa. Hadien bala jai jai bad poi sha ka jingiasngewthuh jingmut, ki Majistor kila phah plie biang ia ka khyrdop ban lum ia ka khajna.
