Shillong, Risaw 10 : Namar ka jingsngap jar jar jong ka Sorkar ia ki mat jingdawa, sa ki nongtrei Casual ka Meghalaya Energy Corporation Limited (MeECL) kiba don ha ka shatri jong ka Meghalaya Progressive Workers Union (MePWU) kila byrngem ban iaid paidbah sha Main Secretariat.
Ia kane ka jingiaid paidbah la pynbna ban pynlong ha ka 17 tarik u Risaw bad kan sdang na ka Ophis treikam jong ka MeECL kaba don ha Lum Jingshai.
Ka MePWU kala pynlong ruh ia ka jingshong dharna ha ki kynta bam ja step (lunch break) kata naduh 1.30 janmiet haduh 2 baje hynne ka sngi nyngkong hakhmat ka Ophis treikam ka Meghalaya Power Distribution Corporation Limited (MePDCL) kaba don mar pyrshah ka Secretariat ban pynbor ia ka Sorkar ba kan pyntreikam noh ia ka jingdawa thungkam pura noh ia ki nongtrei casual bad ban pyllait noh ia ki arrear ba pynsahteng.
Haba iakaren bad ki nongthoh khubor, u President ka MePWU Bah Mantiphrang Lyngdoh Kiriu la ong ba naba ka Sorkar Jylla bad ka Tnad kim shym la ai jubab haba iadei bad ki jingdawa, ka Union kan bteng ia ki jingiakhih ba shi kynta manla ka sngi hakhmat ka Ophis jong ka MePDCL.
U Bah Kiri u la ong ba haduh mynta ka Sorkar Jylla bad ka Tnad ba dei khmih, kam pat ai jubab ia ki jingdawa jong ka Union ban thungkam pura noh ia ki nongtrei casual bad ban pyllait noh ia ka arrear ba pynsahteng.
“Ngi iai bteng da ka dharna ha ki kynta bam ja step tad haduh ka 14 tarik mynta u bnai bad lada ka Sorkar Jylla ka dang iai sngap mynthi, ngin pynlong da ka rally paidbah ha ka 17 tarik Risaw na Ophis ka MeECL na Lum Jingshap sha Main Secretariat” ula ong.
