Nongpoh, Risaw 10: Ka Confederation of Ri Bhoi People (CORP) hynne ka sngi nyngkong, kala dawa ia ka Tnad MeECL baka dei ban ai ia ka song jingiarap sha kawei ka longiing jong iwei I Mei ieid bad Khun Ksiew kiba iap na ka jingshah bat bording ha Nar-ang.
Ha kajuh ka por, ka CORP kala pynrem jur ia ka Tnad MeECL kaba la pyni ia ka jingtrei torti ia ka kam ban sam bording ha ka Jylla, kaba la lam sha ka jingduh noh ia kiba bun ki mynsiem briew ha kylleng ki bynta jong ka Jylla.
Haba iakren bad ki lad pathai khubor, u General Secretary ka CORP Bah Marcus Makri ula pynpaw ia ka jingsngewkhia halor ki jingtrei torti jong ka MeECL ia ka kam kaba la shim ruh ia ka mynsiem jong iwei I Mei-ieid bad iwei I Heprit ba dang 3 snem ha Nar-ang.
Ine I Mei-ieid bad I Khun Ksiew kila iap na ka jingshah bat bording hynnin ka sngi U Blei namar ka jinghap jong u sainar bording elektrik ha uwei u dieng snepkor ba don ha phyllaw iing.
Ka CORP ka dawa da kaba tyngeh ia ka Tnad MeECL ba ka dei ban bthah iala ki jong ki Nongtrei ba ki dei ban khmih bha ia ka jingpyniaid sainar elektrik ha ki shnong ki thaw ban iada na kum kine ki jingjia ba sngewsoh.
