Shillong, Risaw 10: U Myntri ka Tnad khrong khajna (Taxation) ka Jylla James K Sangma hynne ka sngi nyngkong, ula pyntip ba ka Tnad kan sa khot shen ia ka jingialang bad ki Nongialam Niam ban iakren halor ka jingdawa pyndam ia ka Meghalaya Regulation of Gaming Act bad ka jingpynsangeh ia ka jingwanrah casino ha Jylla.
Haba iakren bad ki nongthoh khubor, u James ula ong ba ka long kaba kongsan ia ka Sorkar Jylla ban sngap ia kino kino ki sur jingsngewkhia jong kino kino ki kynhun ba mihkhmat ia ki Balang.
“Nga sngew ba ka long kaba donkam ia ngi kum ka sorkar ban sngap ia kino kino ki jingsngewkhia kiba wan na kino kino ki kynhun kiba mihkhmat ia ki Balang…Nga kwah ban pyntip ban gin sa khot shen ia ka jingialang ban iakren ia kane ka kam bad ki bad ngin sa khmih kumno ngin pyniaid shakhmat ia ka kam” ula ong.
Lah ban kdew hangne, ka Khasi Jaintia Church Leaders Forum (KJCLF) ha ka sngi thohdieng bala lah, kala pynlong ia ka jingiaduwai kyrpang ban pynkohnguh ia ka Sorkar Jylla ban pynsangeh noh ia ka jingthmu wanrah ia ki ktem khalai casino bad ban pyndam noh ia ka Meghalaya Regulation of Gaming Act.
Ia kane ka jingiaduwai kyrpang la pynlong ha KJP English Service Church kaba don ha Khyndai Lad.
U President ka KJCLF u Most Revd Dr Purely Lyngdoh ula ong, ka nongrim kaba ka sorkar jylla ka ieng ka long ban ym pynduh pyndam iaka ain khalai bad kane kan pynlong iaka jylla kum ka ktem khalai bad khamtam haba ka jylla ka dap lypa da ki kam bamsap bampong.
“Ha kum kine ki por kum ki Khristan, ka atiar ka jong ngi kadei tang ka jingduwai, kumta, ngi dei ban buh jingduwai ha u Blei khnang ba ki paidbah bad ka jylla baroh kawei kin kyndit bynriew ia kaei kaba kila leh bad ia kaei kaba kin sa leh” ong u Rev Lyngdoh.
Ha kane ka jingbuh jingduwai kyrpang la wan ban iashimbynta da ki nongialam niam na ki niam bad ki balang bapher bapher, u Myntri sorkar barim ka jylla u Bah AL Hek, ki longkmie bad kiwei kiwei.
