Shillong, Naitung 15: Lai kynhun jong ki Nonghikai SSA hynne ka sngi thohdieng, kila pynpaw ia ka jingbynniaw hadien ba ka Tnad Education kam shym la lah ban ai kano kano ka jingkular halor ka jingdawa ban pyllait noh mardor ia ka tulop ba pynsahteng.
Katba ki Nonghikai kiba don ha ka lama jong ka Meghalaya SSA School Association (MSSASA) kila rai ban khot ia ka jingiakhih ba khlem pud naduh ka 18 tarik Naitung, ka All Meghalaya SSA Teachers Association (AMSSATA) bad ka All Garo Hills SSA School Teachers Association (AGHSSATA) kila pynsangeh noh shuwa ia ka jingiakhih, kaba la sdang hynne ka sngi ha ka jaka pynieng kali marjan ka Additional Secretariat, hadien ba ka Chief Secretary kala khot ia ki ban iakren ha ka sngi nyngkong.
Ki Nongialam jong kine ki lai kynhun kila niew ia ka jingmih n aka jingialang bad u Secretary ka Tnad Education Bah R Rapthap kum ka “Bym seisoh” hadien ba um shym la ai ban ai ka jingkular sha ki.
Hadien ka jingialang, u President ka MSSASA Bah Aristotle C Rymbai ula ong ba ka Association kan sa pynlong ia ka jingia shong kyllain mungor naduh ka 18 tarik Naitung, lada ka Sorkar Jylla kam lah ban pyntreikam noh ia ki jingdawa jong ka.
Ka MSSASA kala buh ia saw tylli ki mat jingdawa hakhmat u Bah Rapthap bad kine ki kynthup ia ka jingsiew noh ia ka tulop ba san bnai kaba dei jong u Bah Rymphang-Lber jong u snem 2021-2022 bad Iaiong, Jymmang bad Jylliew jong u snem 2022-2023, ban pynkiew ia ka tulop jong baroh ki Nonghikai SSA kiba don haduh12,451 ngut, ban mang pisa kham bun naka mang tyngka ka Jylla bad ban pyniasoh noh ia baroh ki Nonghikai SSA n aka State Implementation Society sha ka Tnad Education.
“Hynrei ka jingmih na ka jingialang mynta ka sngi kam shym long kaba seisoh namar ka Sorkar kala pan por, ka ban long sa kumba artaiew baka Sorkar Pdeng kan pyllait ia ka pisa sha ka Jylla ban siew ia ka tulop balai bnai” ong u Bah Aristotle.
U Bah Aristotle ula ong ba u Secretary ka Tnad Education ula pyntip b aka jingpyllait ia ka tulop kan shong eh ha ka jingdon ka pisa bad um shym la pynthikna la ka SSA kan ioh ne em ia ka pisa ban siew ia ka tulop ba san bnai.
Ula bynrap ba u Secretary ka Tnad um shym la ai satia ia kano kano ka jingkular sha ki nonghikai SSA halor ka jingdawa jong ki, khamtam ia ka jingdawa ban pynkiew ia ka tulop da kaba ong ba kane ka jingdawa ka dang don hapdeng ka jingbishar.
“Ngim sngewbha ia kane ka jingkular bala ai da u Secretary ka Tnad Education, namar kata, ngin pyniaid beit shakhmat ia ka jingiakhih jong ngi ba khlem pud naduh ka 18 tarik Naitung” ula ong.
Ha kajuh ka por, u President ka AMSSASTA Bah Last Marngar ula ong ba watla ka jingialang bad u Secretary kam long kaba pynhun ia ki hynrei kila rai ban pynsangeh shuwa ia ka jingiakhih namar ka Chief Secretary kala khot ia ki sha ka jingiakren ka ban long ha ka sngi nyngkong.
“Lada ka jingmih na kane ka jingialang bad ka CS kam long kaba hun, ngin sa pynbteng biang ia ka jingiashong kyllain myngor ba khlem pud” ula ong.
