Iasoi soskular ka Assam- Arunachal ban pynkut noh ia ka jingiakynad pud ba 70 snem

Date:

Share post:

Guwahati, Naitung 16 :Da ka jingthmu ban pynkut noh ia ka jingiakynad pud ka ba la neh mynta lah kumba hynniewphew tylli ki snem hapdeng ka Assam bad ka Arunachal Pradesh, na ka liang ki Myntri Rangbah (CM) jong kine ki artylli ki jylla ki la ia soi ia ka soskular hynnin ka sngi Thohdieng ha Namsai, Arunachal Pradesh.

U CM ka Assam u Himanta Biswa Sarma bad u CM ka Arunachal Pradesh u Pema Khandu ki la mynjur ban ia pynbeit ha ka ba iadei bad ka jingdon jong ki shnong ki ba don ha ka jingiakynad sha ka 86 ha ka jaka jong ki 123 tylli.

“Ngi la rai ban ia pynbeit ha ka ba iadei bad ki shnong ki ba don ha ki jingiakynad sha ka 86 ha ka jaka jong ki 123 tylli ki shnong.Da ka ba pynshong nongrim halor ki pud ki sam ki ba mynta, ngin pyrshang ban weng ia kiwei pat ki jingeh kat haduh u bnai Nailur u ban wan,” pynpaw u Sarma lyngba ka twitter hadien ka jingialang bad u Khandu.

Nalor kata ki la rai ruh ban thaw ia ki 12 tylli ki regional committee ban khlieh da ki myntri ka Cabinet na ka bynta ban lah ban ia pynbeit ia kane ki jingiakjia hapoh ki shnong ki ba don ha ki thain khappud.Ha katei ka jingialang, u Sarma bad u Khandu ki la mynjur ban bishar bniah halor ki 37 tylli ki shnong khappud ki ba don hapdeng ka jingiakynad.

Katba ka Arunachal Pradesh kan iai bat ia ki 28 tylli ki shnong ki ba hap hapoh ki riti synshar ki ba hapoh u pud u sam jong ka, hynrei ka jylla ka la pyllait noh halor ka jingkam trai ia ki laitylli ki shnong ki ba hap sha ka Assam.

“Baroh ki ar jylla kin thaw mar 12 tylli ki Regional Committee ki ban kdup ia 12 tylli ki district ka Arunachal bad ki district Assam na ka bynta ban pynshisha ryngkat lang ha ka ba iadei bad ki 123 tylli ki shnong bad ban aijingmut lang sha ki sorkar jong kine ki ar jylla,” pynpaw u Khandu lyngba ka twitter.

Kine ki regional committee kin phah ia ki kaiphot ba nyngkong jong ki ha ka ba iadei bad kine ki shnong lane kiwei pat ki jaka ki bym pat poi sha ka jingiamynjur hashwa ka 15 tarik u Nailur u ban wan.

Da ka ba khot ia kane ka jingiateh soskular kum ka “Namsai declaration”, namar ia kane ka jingialang la pynlong ha Namasai, Arunachal Pradesh, na ka liang u CM ka Assam u la ong ba baroh ki ar jylla ki la shim ia ka rai ban shim ia ki sienjam ban lah ban pynkut noh ia kine ki jingeh kam khappud ki ba naduh kine ki hynniewphew tylli ki snem ba la leit noh hapoh jong une u snem.

“Hadien ba ki regional committee kin pynkut ia kane ka jingpyrshang ka jong ki tad haduh ban da poi sha ka jingiamynjur hapdeng kine ki artylli ki sorkar jylla, ia ka Mou yn phah sha ka sorkar pdeng na ka bynta ban ai ia ka jingmynjur,” pynpaw ka Namsai Declaration.

Ha katei ka jingialang na ka liang ka Assam nalor u CM Sarma la mihkhmat ruh da ki dkhot jong ka kynhun myntri ki ba kynthup ia u Atul Bora, Ashok Singhal, Pijush Hazarika, Bimal Bora, Sanjay Kisan, MP Pradan Baruah, MLA Bolin Chetia bad u Taranga Gogoi.

Katba na ka liang ka Arunachal Pradesh nalor u CM Pema Khandu la ia don lang u Deputy Chief Minister Chowna Mein bad ka kynhun myntri.

Share post:

spot_img

Popular

More like this
Related

Megh Govt inks MoU to set up India’s second Green Skills Academy for youth in Shillong

Shillong, Feb 28: Making a major move to empower the...

Manipur : Pyndem suloi ki Pulit Commando ka Manipur ha Imphal

Imphal, Rymphang 28: Ka kynhun ki Pulit Commando ka...

Tripura: Sngewkhia jur u CM ba kiew ka jingdih droks hapoh ka Jylla

Agartala, Rymphang 28: U Myntri Rangbah ka Tripura Manik...

Manipur : Ioh pyllait im ki Pulit ia u Addl SP na kti ki kynhun kaikhlaw

Imphal, Rymphang 28: Ki Pulit kila ioh ban pyllait...