Guwahati, Naitung 16 :Hadien ba la shah set phatok ar bnai kynthih, ka samla pule undergraduate na Assam ka Barshashree Buragohain hynne ka sngi Saitjain ka la leit ban thoh ia ka eksam jong ka hapdeng ka jingpyrkhing pahara hapoh ka phatok ha Golaghat, Assam.
Kane ka jinglong jingman ka la wan long hadien ba kane ka samla 19 snem rta ka la ioh jingbit na ka iingbishar kane ka thain ba kan pyndep ia ka eksam jong ka napoh ka phatok ha Golaghat hapdeng ka jingpyrkhing pahara.
Ka Buragohain ka la shah kem noh ha ka 18 tarik u Jymmang ba ladep na Uriamghat hapoh Golaghat district bad shah pynngat ha ki kyndon UAPA namar ka jingdonkti ha ka ba thoh ia ka poetry ka ba la ai kyrteng ”Akou Korim Rashtra Droh” (Hato ki riewialeh kin iakhun pyrshah ia ka ri sa shisien pat).
“Ka ba thoh ia ki poetry kam dei ka ba sniew.Nga ruh nga thoh poetry, hynrei ka Barshashree ka la shah kem noh tang namar ba ka la thoh ba kan leit pyniasoh bad ka kynhun seng lehnoh ULFA,” ong u DGP Bhaskar Jyoti Mahanta ha ba kren sha ki lad pathai khubor.
Lah ban kdew ba ka jingshah kem jong ka Barshashree ka ba dei ka samla pule undergraduate ha ka mathematics ka la pynmih ia shibun ki jingshah kynthoh ha baroh kawei ka jylla.Ha ba ai ka jingkyrshan na ka bytna jong ka, ki seng samla pule, ki liang pyrshah bad ki riew shemphang ki la dawa ba dei ban pyllait noh mardor ia kane ka samla na ka jingshah set phatok.
Na ka liang u Special Director General of Police (Law and Order) u GP Singh lyngba ka Twitter u la ong, “Ka la don ka jingkhot na ka bynta ban hiar thma pyrshah ia ka ri lyngba ka Facebook post ka jong ka.Ha ba don ki ba pynpaw paidbah ia ka jingkyrshan na ka bynta ka seng lehnoh ba la shah khein beain bad pynbna halor ka jingthmu ban iakhun da ka thma pyrshah ia ka ri, katkum ki kyndon ain ngi don ia ka bor ban pynshitom ia ki ba kum kine ki briew.Hadien ba la pyndep ia ki jingdonkam baroh, yn phah ia ka jingujor sha ka iingbishar bad ai ba ka ain kan leh ia ka ba donkam baroh.”
