Shillong, Jylliew 20: Ka Assembly Committee for Women Empowerment kala kynnoh ba kam don satia ka jingiatreilang hapdeng ka Meghalaya State Commission for Women (MSCW), ka Meghalaya State Commission for Child Rights (MSCPCR) bad ka Tnad Pulit ha kaban leh eiei halor ki kam thombor ia ki Kynthei ha ki Iing ki sem bad ki kam bymman pyrshah ia ki Khynnah hapoh ka Jylla.
Ka Assembly Committee for Women ka la khot hajir mynta ia kine ki artylli ki Commission bad ia u Director General of Police (DGP) ha ka jingshong bishar hynne ka sngi, ban pan ia ka kaiphod halor ka jingshah pyniap ki arngut ki Khynnah ha la u jong u Kpa u J Jana, kaba la jia ha ka Shnong Nongrah.
Hadien ka jingialang, I Chairperson ka Committee for Empowerment kong Ampareen Lyngdoh ila ong ba ka jingshem ba nyngkong eh ha ka jingkhot hajir ia ki khlieh jong kine ki shnat treikam ka sorkar hynne ka sngi ka dei ka jingbym don satia ka jingiatreilang hapdeng jong ki.
I pyntip ba kila don ki jingiakynnoh markylliang halor kaei kaba jia ha kane ka jingjia ha shnong Nongrah bad namar kata “Ngi la bthah ia ka MSCW bad ka MSCPCR ba kin iatrei ryngkat ryngkat bad ka Tnad Pulit. Ngi la kyntu ia ki ba kin shong jingialang kham kloi para maki khnang baroh ki jingshisha kin paw shai bad sngewthuh da ki paidbah” .
“Hooid, ka ju don ka khep ba kyntait ia ki jingujor ia ki kam shah thombor ki kynthei ha ki Iing ki sem bad kane ka dei ka bainong kaba heh duh ba ki hap ban siew. Ka long kaba sngewsih, ka bym lah ban pdiang hynrei ka kam bymman kala dep jia.Namar kata, nangne shakhmat, kum kine ki jingtreikam bym suidniew kim dei ban jia shuh” ila bynrap.
Haba pynpaw ba ka Assembly Committee kam shym la iohbor ban buh jingkylli ia kine ki jingduna, ine I MLA ka East Shillong Constituency ila ong “Ngi don ia ki Commission ha Jylla Meghalaya-ka MSCW bad SCPCR kiba la kyrshan da ki bor jong ka aiñ. Mynta kin sa shong jingialang para maki bad ka Tnad Pulit bad kin sa iapuson ba kumno kane ka jia bad kin sa wad ruh la ka la don ne em ka jingujor case, bad lada don ki dei ban wad ia kaei kaba jia pat”.
I Kong Ampareen I pyntip ba ka Assembly Committee kam da sngew hun haduh katta katta ia ka kaiphod bala aiti da ki Pulit bad ong “Hynrei ngin nang iai buddien ia kane ka case” . I pyntip ba ka Committee kala aipor 15 sngi ia kine ki lai tylli ki bor treikam ba kin leh eiei ryngkat ka jingbthah.
“Mynta ngin ap ia ka jingialang hapdeng kine ki Commission bad ka Tnad Pulit bad ngin sa shong bishar ia ka kaiphod ba kin aiti ia kaba ngi la aipor 15 sngi” ila ong.
Haba pynpaw ia ka jingdonkam ba ka Tnad Pulit ka dei ban ai jinghikai shala ki jong ki briew, I kong Ampareen ila ong “Ka dei ka jingshisha ba wat ki Pulit Kynthei ba pyniaid ia ki PoliceStation ki lah ban nym tip bha shaphang ka Domestic Violence Act lane POSCO lane ka jingrahbor lane ka jingjah ki khynnah”.
“Nalor kane,ngi dei ruh ban pynthikna ba haba don ki nongujor ba ym dei satia ban ap haduh ban da ujor ia ka ejahar” ila ong.
