Nongpoh, Nailur 25 : Ka Bharatiya Janata Party (BJP)-Umroi Mandal ha ka sngi Thohdieng, kala leit iakynduh ia u Deputy Commissioner ka Ri-Bhoi District Dr Abhishek Saini ban pan jingpynshai halor ka jingpyniaid lynti ia ka Express High Speed Corridor lyngba ka thain Umroi.
Ka kynhun ka BJP hapoh ka jingialam u President Bah Bandari Ryntathiang, kala aiti ruh ia ka dorkhas ha une u khliehduh ka district ba pan jingtip kaba shai shaphang kane ka surokbah bad ka jingktah ia ki trai jaka jong ka thain.
Haba kren sha ki nongthoh khubor, u Bah Bandari u la ong ba ka daw kaba la pynlong ïa ka party ban wan kynduh ïa u Deputy Commissioner ka long namar ka jingartatien jong kiba bun ki paidbah halor ka jingwan shisha ne em jong katei ka surokbah lyngba ka thaiñ Umroi.
“Ka daw kaba ki paidbah ki artatien ka long namar ba ki sheptieng lada shna ïa ki ïing ki sem ne rep ïa ki mar rep bad lada wan pat katei ka surok, kan ktah ïa ki bad ioh lehse kin nym ïoh jingsiew,” ong u Bah Bandari Ryntathiang.
U la ïathuh ruh ba u Deputy Commissioner, ula pynshai ba ka projek ka la don lypa bad ki la dep ruh ban leh ïaka sor jamin ïa ki jaka kiba kan ïaid lyngba.
U la iathuh, Katkum ka jingpynshai kaba la ïoh na u Deputy Commissioner, la ong ba ka jingpyntrei ïa katei ka surokbah ka lah ban sdang noh naduh u bnai Nohprah bad bteng shakhmat, katkum ka jingpynkhreh jong ka sorkar.
U Bah Ryntathiang u la ong ba ka BJP Umroi Mandal ka sngewkmen ban ïoh ïa kane ka jingpynshai, khnang ba ki trai jaka kin ym sah ha ka jingdum halor ka jingwan jong ka surok.
Ha kajuh ka por, u la pynpaw ïa ka jingangnud ba ka jingwan jong kane ka projek kan wanrah ïa ka jingmyntoi ïa ki paidbah bad ba ïa ka kam yn pyntrei hok katkum ki jingmang bad ki kyndon jong ka sorkar.
