Shillong, Naitung 25 : Ka Assembly Committee on Women Empowerment hynne ka sngi nyngkong, kala pynpaw ia ka jingbynniaw kaba jur halor ka jingkiew ki kam thombor pyrshah ia ki kynthei bad ki Khynnah hapoh ka Jylla.
Hadien ba pyniaid ia ka jingialang jong ka Committee, I Chairperson ka Committee kong Ampareen Lyngdoh i la iathuh ba u Superintendent of Police ka East Jaintia Hills ula pyntip hakhmat ka Commission ba haduh 26 tylli ki case la register kiba iadei bad ki kam thombor pyrshah ia ki kynthei bad ki khynnah hapoh ka District tang naduh u bnai Kyllalyngkot haduh mynta.
“Ngi la kyntu ia u SP ban wanrah ia baroh ki jingtip ba bniah halor kine ki 26 tylli ki case” i la ong.
I Kong Ampareen I pyntip ba ka Committee kala ioh ia ka jingbatai kaba bniah halor ka case ba jia ha Jaliar ha kaba u Kurim ula ksih haban da iap iala ka jong ka kurim bad mynta une u kurim ruh u la shah pyniap bad ka jingtohkit ia kane ka jingjia ka dang iaid shakhmat.
Halor ka jingjia ha Nongrah ba shah pyniap ki arngut ki heprit ha la u jong u Kpa, I Kong Ampareen i ba dei i MLA ka East Shillong Constituency i la iathuh ba ka Tnad Social Welfare kala pyntip baka jingpynkhreh ban pyllait ia ka song pisa ba T. 5 lak sha kane ka longiing kan sa dep hapoh ka 10 sngi ban wan.
“Ka jingtohkit kala iaid bha namar la pyntip sha ngi ba ki Pulit kila jam shakhmat ha ka jinglum ia ki sakhi satar bad ban iasaid ia ka hok jong kine ki Khynnah kiba la duh ia la ka jingim” i la ong.
U Dkhot ka Committee bad MLA ka Mawsynram Bah Himalaya Shangpliang u la ong ba la bthah ia ka Social Welfare ba kan shimkhia ia ka jingshah ktah ka jingmut jingpyrkhat jong ka Kmie kine ki arngut ki Khynnah bad ia ka para jong ka.
Haba phai pat sha ka jingarmet khynnah hapoh ka Jylla, I Chairperson i la ong “Ngi la bthah ia ka Tnad Pulit, ka Tnad Social Welfare, ka Women’s Commission, ka Child Protection Commission ba kin pynkhlain ia ka jingiatreilang ha kaban tem ia ka jingnang kiew ha ka jingdon ki samla lud ba armet ha kylleng ki bynta jong ka Jylla Meghalaya”.
Ha kajuh ka por, u Bah Shangpliang u pyntip ba ka Committee kala khot hajir ruh ia ki katto katne ki shipai bala shongthait kiba pahara ha ki IT sector, Hospital bad ha North Eastern Hill University (NEHU) namar ka jingioh pdiang ia ka jingujor ba ki nongaikam kim shimkhia satia ia ka jingdonkam jong ki.
