Nongstoiñ, Risaw 27: Ka Mawshynrut Civil Sub Division ka dei kaba la kiew bha ha ka jingdon ki surok, kiba la poi mynta sha jan man la ki dong ki thain hynrei ka jingshu ieh khlem peit jong ki bor sorkar, kiba bun ki surok ka thain kila nang sniew katba nang iaid ki snem bad bun kim long shuh ban iaid kali.
Kane ka sur kala mih na ki Nongialam jong ka Synjuk ki Rangbah Shnong ka Langdongdai Area (SRSLA) kiba la bynniaw jur halor ka jinglong jingman ki surok hapoh ka thain namar ka jingjot rathai bad bun satang ki thliew ki syar.
Kawei na ki surok ka thaiñ kaba la sniew sha ba palat ka dei ka surok na Mawdiang sha Langdongdai, kaba dei ka surok kaba la shna lyngba ka skhim shi spah sngi.
U Bah Arful Mangsang Secretary ka Synjuk Rangbah Shnong Langdongdai Area (SRSLA) bad u Bah Kardening Rongrin, ki la їathuh ba katei ka surok ka long kaba donkam haduh katta katta, namar katei ka thaiñ ka dei kaba lah ban pynmih bun bha ki mar rep kum u sying, u kwai, synsar, ki soh ki pai bad kiwei kiwei.
Ki la ong ruh ba ha ki snem ba la leit noh, ki paidbah na ki 14 tylli ki shnong ka thain, ki ju pynlong їa ka jingmih paidbah ban maramot da kaba trei dala ka bor met ia kane ka surok hynrei ka jingduna pisa, kala buh ha ka jingeh ban lah pynlong ia kane ka surok ba kan long kat haduh ba ki kali kin lait suk ban їaid.
Ki la їathuh ruh ba ha une u snem lei lei namar ka jingjur palat u slap, ki longkmie kiba thmu ban leit kha khunlung ha Riangdo CHC ki hap ban їaid da ka kjat haduh lai bad saw kynta haduh ban da poi ha ki jaka ba lait kali.
Ki la ong ba ka jingeh kaba kham hakhmat eh ka dei їa kiba pang ba shitom namar ba hap ban pynkit da u briew haba ki mut ban leit phah sumar. La ong ba dei namar kitei ki jingeh ba ki paidbah na katei ka thaiñ, ki hap ban shaniah beit ha ki nongai dawai kynbat khlaw, haba ki pang ki shitom bad wat ki longkmie kiba armet ruh ki hap ban shaniah ha ki dawai kynbat, namar ki shem jingeh ban leit sha Hospital namar ka jingbym don їa ka surok kaba biang.
Kitei ki rangbah ki la dawa їa ka sorkar ba kan phai khmat lem sha katei ka thaiñ ban pynbha bad maramot їa katei ka surok, khnang ba ki paidbah kin lait na ki jingeh ha ka leit ka wan.
