Shillong, Jylliew16 : U Myntri Rangbah ka Jylla Conrad K Sangma ha ka sngi Nyngkong, ula ong ba ka Sorkar Jylla kala buh ia ka thong ban pynkylla dur ia ka kam sumar sukher ia ki nongpang hapoh ka Jylla haba pynpaw “Ngim kwah shuh ban iohi ia ki nong Meghalaya kiba hap ban mih na Jylla ban leit wad jingsumar shabar ka Jylla”.
U Myntri Rangbah ula pyntip ruh ba ka Sorkar kala shimkhia ia kiba bun ki jingtynjuh ban wanrah ia ka jingpynkylla dur ha ka liang ka lad ai jingsumar sukher ha Jylla.
“Ka kam ka koit ka khiah kala iai shah iehbein na kiba bun ki daw ha baroh kine ki snem bala leit, hynrei kane ka Sorkar kala shim ia ka jingkitkhlieh ban leh eiei ia kane ka bynta lyngba ki jingpynkylla bapher bapher” ong u CM haba kren ha ka Health Summit ba nyngkong eh, kaba long ha Shillong.
“Ka thong jong ngi ka long ba mano mano kiba donkam ia ki jingsumar, kim dei shuh ban hap leit wad jingsumar shabar ka Jylla. Ia ki kam ai jingsumar yn sa pynkylla ha kata ka rukom ba ki nongshongshnong ka Jylla, ka thain bad ki ri ba marjan kin peit sha ka Jylla Meghalaya ban ioh ia ka jingsumar. Ka dei ka thong kaba heh, hynrei ngi hap ban buh ia ka thong bad pynkhreh ialade na ka bynta kane ka kam. Ka dei ka lynti iaid kaba jrong-to ngin buh shai bha ia ka thong, to ngin kynshew bad leh ia ki kam kiba donkam. Ka koit ka khiah kam dei tang ka jingkitkhlieh ka Sorkar, ki kynhun bapher bapher ruh ki don ia ka bynta kaba kongsan” ula bynrap.
Ka Myntri ka Koit ka Khiah Dr Ampareen Lyngdoh bad ki kynhun bapher bapher kynthup ki Nongmihkhmat na ki hospital bapher bapher ka Jylla, kila wan iashimbynta ha kane ka Health Summit.
Haba kren halor ki jingkut jingmut ka Sorkar ban pynkhlain ia ki jingshakri ha ka liang ki lad jingaisumar bad ki soh ka jing shakri, u Myntri Rangbah ula ong “Ka koit ka khiah ka dei kawei na ki paia ba kongsan eh ha ka synshar khadar, bad ha ngi hangne ha Meghalaya, kala iai long ka mat treikam ba hakhmat eh”.
“Kane ka summit kam dei tang shaphang ki nombor hynrei ki jingmih-kumno ka jingkynshew ka kylla long sha ka jingpyn janai ba shisha ha ka jingim jong ki briew jong ngi” ula bynrap.
Haba pyntip ba ka Jylla Meghalaya kala ai palat 8% na ka mang tyngka ka Jylla sha ka koit ka khiah, kaba dei ruh ka mang tyngka ba hehduh napdeng ki Jylla hapoh ka Ri, u Conrad ula ong ba kane kam dei satia tang ka jingkhein na ka mang tyngka hynrei ka pyni ia ka jingshimkhia hakhmat eh jong ka Sorkar. “Ha kine ki hynniew snem bala leit, ka Sorkar kala pyntreikam ia shibun ki kam ban pynbha ia ki jingtei, ka jingdon ki nongtrei kiba tbit, ka jingpyntrei ia ki technology bad ka jing sumar ba lah ban ioh da baroh” ula pyntip.
Haba pynpaw ba ha ka por ba kane ka Sorkar ba mynta ka shimti ia ka Sorkar ha u snem 2018, ka Jylla kala mad ia ka jing duna doktor ba palat 500 ngut. Namar ka jingslem ban thungkam lyngba ka MPSC kaba la iaid la palat saw snem, ka Sorkar kala rai ban pynkha ia ka Meghalaya Medical Services Recruitment Board (MMSRB), kaba la thung ia palat 500 ngut ki doktor tang ha kine ki lai bnai.
Ha kane ka Health Summit, u Myntri Rangbah bad ka Myntri ka Koit ka Khiah, kila aiti ia ka shithi thungkam sha ki 164 ngut ki Nos bad 78 ngut ki Auxiliary Nurse Midwives (ANMs) bad 181 ki doktor AYUSH hapoh ka National AYUSH Mission.
U Myntri Rangbah ula plie ruh ia ka jingsdang ia ka Meghalaya State Antibiotic Policy 2025-2026.
