Shillong, Jymmang 27: Ka Tnad Pule Puthi ka Jylla kala buh ia ka thong ban pynbeit ryntih noh ia palat 600 tylli ki skul sorkar bad skul Samagra Shiksha Abhiyan (SSA), kiba ia don marjan hapoh jong ka wat kaba nyngkong hapoh jong une u snem.
Ka jingthmu ka long ban pynduna ia ka bhah tyngka ha kaba iadei bad jingsiew ia ka tulop jong ki nonghikai. Kumba long mynta, ka Meghalaya kala pynlut palat ia ka T.2400 Klur ban siew ia ka tulop ia palat 40,000 ngut ki nonghikai ha kaba tang 7000 ngut kidei ki nonghikai sorkar.
Haba pyntip ia kane hynne ka sngi baar, u Commissioner & Secretary uba khmih ia ka pule puthi u Vijay Kumar Mantri, ula ong, “Ngi dang pyrshang ban pynbeit ia ki 600 tylli ki skul sorkar bad skul SSA, kiba ia don marjan ha ka wat kaba nyngkong”.
“Ka SSA ruh ka long kum ka skul sorkar. Phim lah ban don ar tylli ki skul sorkar kiban ia donlang marjan. Kumta ngi dang pyrshang ban pynbeit bad ngin sa ia peit ia ka nombar. Ngi buh ia ka thong na ka bynta ki 600 tylli ki skul mynta u snem” ula ong.
U Mantri ula pyntip ba ka tnad kala pynshlur ruh ia ki skul shimet ban sdang noh ia kane ka rukom pynbeit. “Namar ba ki don ki skul Deficit ha kaba ki nonghikai ki ioh ia ka tulop sorkar. Kumta ngi lah bthah ia ki District School Education Officer (DSEO) ban ialeh ban pynbeit lada jia ba kano kano ka skul kam don satia ia kino kino ki khynnah skul, kumta phi pynkynriah kam noh ia ki nonghikai sha ki skul kiba don marjan kaba don bun ngut ki nongpule” ula ong.
Ha kaba iadei bad ka jingkylli halor ka jingjot jong ki building ne iing skul kiba don ha kylleng jong ka jylla, u Mantri ula pynshai, ba ka Meghalaya ka don palat ia ka 55,000 ngut ki nonghikai haba ianujor bad kiwei pat ki jylla jong ka thain shatei lammihngi, namar kane, kumta tang khyndiat eh ka bhah tyngka kala don na ka bynta ban pynbha ia ki jingtei jongki skul ha ka jylla.
“Ka jingtei ia ki jingtei bapher kidei ki mawjynthud. Lada phi peit mynta ha ka bhah tyngka ha ka pule puthi, T.2400 Klur kala leit tang sha ka tulop, kumta tang khyndiat eh ka bhah tyngka kala don ban pynbha ia ki jingtei” ula ong.
Ula kubur ruh, ba ka long kaba kongsan ia ka jylla ban pynbha ia ki jingtei namar ba ka mad ia ka jingjur u slap bad khlem ka jingpynbha bad jingmaramot, bun ki jingtei jong ki skul kila mad jingeh.
Ula pyntip, ba ka tnad hapoh jong ka Asian Development Bank (ADB) scheme kala shim ban kyntiew kyrdan ia ki 65 tylli ki skul bad ban tei ia ki kamra skul kiba thymmai.
“Ngi lah don ruh ia ka Mission Education bad hapoh jong kane, ar wat ki lah dep don bad bun tylli ki skul kila don. Bun tylli ki skul kin sa shah kynthup ha ka wat ka balai bad ha ki wat kiban sa wan. Katkum ka jingbhah ia ka tyngka, ngi la shim da kaba iaid da ki wat” ula pyntip.
U Commissioner & Secretary ula pynshai ba ka T.2400 Klur ka leit thik tang na ka bynta ban siew tulop ia ki nonghikai, katba na ka bynta ki college sa T.300 Klur kadei kaba donkam man la ka snem. Ula kdew ruh ba ka sorkar ka la kyrshan ia ki 40,000 ngut ki nonghikai bad na katei, tang 7000 ngut kidei ki nonghikai sorkar bad kiba tam hi kidei ki nonghikai shimet.
