Shillong, Jymmang 27: Ka Captain Williamson Sangma State University (CWSSU) shen kan sa sdang noh ia ki kam ha kaba iadei bad ka jingpynrung klas ne ai Admission.
“Ngin sa pynmih ia ka notis ban pdiang noh shen ia ka jingpynrung klas. Ngin sa sdang noh ia ka jingshim ia ka Admission” ong u Commissioner & Secretary ka pule puthi u Vijay Kumar Mantri, haba iakren bad ki nongthoh khubor hynne ka sngi Baar.
Haba kyntait ban kren eiei ha kaba iadei bad ka mat jong ka Bijini Complex, ula ong, “Mynta kala don hapoh ka iingkashari High Court bad kumta ngim don eiei ban kren ne pynpaw namar ba ka dang don hapoh jong ka jingbishar jong ka iingkashari”.
Ula ong, ba ka mat jong ka Bijini Complex kam dei ban mih. Ka Sorkar Jylla kala tyrwa ban pynlong ia ka Bijini Complex kum ka ophis treikam kaba shipor jong ka CWSSU Shillong Campus.
“Haba ka Sorkar Pdeng ka don eiei kaba long pyrshah ia ka Sorkar Jylla, namar ba ka NEHU kadei ka skulbah jong ka Sorkar Pdeng, kumta ka NEHU ka lah dei ban shim ia ka jingmynjur na ka Sorkar Pdeng namar ba kila ujor mukotduma pyrshah ia ka Sorkar Jylla kumta kila dei ban pan jingbit shwa” la ong u Mantri.
