Shillong, Rymphang 24: U Symbud Myntri Rangbah ka Jylla Bah Sniawbhalang Dhar, hynne ka sngi Saitjain, ula buh mawnongrim ban tei ia ka hospital AYUSH ba 30 jingthiah ha Mookyndur, West Jaintia Hills Distrct.
Ia une u mawnongrim la buh ha ka jingdonlang ka Myntri ka Koit ka Khiah Kong Ampareen Lyngdoh bad u Director ka AYUSH Dr. Joram Beda.
Haba ai jingkren, u Symbud Myntri Rangbah ula pynsngew ia ki jingphai khmat jong ka Sorkar Jylla sha ki kam pynroi bapher bapher khamtam sha ka koit ka khiah na ka bynta ki paid nongshongshnong. Ula pynpaw ruh ia ka jingsngew nguh ia ka shnong Mookyndur kaba la ai sngewbha ia ka jaka ba 5 acre ban tei ia kane ka hospital AYUSH.
Ula ong ba ka jingwan jong kane ka hospital kan ai jingmyntoi ym tang ia ki paidbah ka thain hynrei wat ia ki shnong ki thaw ba marjan. Ula kyntu ia kiba don bynta ba kin trei wut wut ia ka kam khnang ba ka hospital kan ioh ban shakri noh ia ki paidbah.
Ka Kong Ampareen kala pynpaw ba kane ka hospital kan ai ia ki jingsumar ha ka Ayurveda, Unani bad Homeopathic khamtam ia ki jingpang ki bym iabit. Kala ai ka jingiaroh ia ka jingtrei shitom u Dr Beda ha kaban pynurlong ia kane ka project.
