Shillong, Rymphang 24: U MLA ka South Shillong u Bah Sanbor Shullai hynne ka sngi, u la pyntip ba ka Sorkar Pdeng kala mang T.5 klur ban tei ia ka jaka sah ki Pulit (Quarter) jong ka Laban Police Station.
Hashuwa kane u Bah Sanbor haka jingdon lang u Executive Engineer ka tnat Engineering Wing ka tnat Pulit, u OC ka Laban PS Naushad Khan, ki nongïalam shnong, kila pynlong ka jingjurip ia kane ka jaka naka bynta ban tei ia ka jaka sah ki Pulit.
Haba kren sha ki lad pathai khubor u Bah Sanbor u la pyntip ba ka jaka sah (Quarter) jong ki Pulit ka Laban PS ka dei kaba la rim bha bad ka dei ruh kaba shu tap daka tin bad dei namar kata donkam ban tei thymmai noh khnang ban pynbiang jaka sah iaki Pulit.
U Bah Sanbor u la pyntip ba ka Quarter jong ka Laban PS ka don arbynta kata ka jaka sah bad ka jaka ieng kali bad haka bynta kaba nyngkong yn tei shwa tang iaka Quarter haka jinglut kaba T.5 klur.
U la iathuh ba iaka song pisa kaba T.5 klur kadei kaba wan lyngba ka Sorkar Pdeng lyngba ka tnat kam pohïing
“Nga ai khublei ia u Myntri Rangbah, u Symbud Myntri Rangbah ba khmih iaka tnat kam pohïing bad ia u Bah Lahkmen Rymbui. Nga la thoh bun sien haba iadei bad ka jingdonkam ban tei thymmai iaka jaka sah (Quarter) ki Pulit ka Laban PS bad mynta ka kynti ka song pisa kala don kumba T.5 klur duna” ong u Bah Sanbor.
U Bah Sanbor ula pyntip ruh na naka liang ka Engineering Wing ka tnat Pulit kala dep ban pynbiang iaka DPR ban tei ia ka Quarter naka bynta ki 20 haduh 25 tylli ki longïing jong ka Laban PS bad kane ka jingtei kan sdang treikam noh hadien ka dorbar mang tyngka.
U Bah Sanbor u la pyntip ruh ba la mang T.55 lak naka bynta ban tei daki nala Aqueduct Drainage System na surok PWD Road Laban ter ter shaduh St John School.
 jong ka Laban Police Station.){kind=link}