Shillong, Risaw 31: Ha ka jingkhynra kaba jur ia ka drok syndicate hapdeng ki jylla, ka Meghalaya Anti- Narcotic Task Force (ANTF) ha ka jingkhynra lang bad ki pulit ka West Garo Hills ki la ioh kurup haduh 112.52 gram u drok heroin bad la kem ruh ia arngut ki briew na Goalpara, Assam ha ka sngi Saitjain.
Ia kane ka jingkhynra la pynlong ha Tikrikilla halor ka jingtip ba bniah na ka liang ka tnad syntiat, la iathuh ki pulit.
U SP ka ANTF u Vikash Kumar u la iathuh ba la ioh ruh ban kurup ar tylli ki kali bad lai tylli ki mobile phone ryngkat bad ki 10 tylli ki synduk sabon plastik kiba la suba ba ki shong dor kumba 60 lak tyngka ha ki iew beain.
Kiba la shah kem ki dei kiba la tip kyrteng kum u Shahadot Ali 31 snem ka rta na Rakhyasini Jungle Block, Mornoi, Goalpara bad u Rejaul Islam 31 snem ka rta na Helapokri, Baladmari, Mornoi, Goalpara.
Ki pulit ki la iathuh ba la register ia ka case katkum ka ain NDPS ha Tikrikilla Police Station.
Katkum ki pulit, la suba ba kitei ki arngut ki dei ki bynta jong ka kynhun runar kaba kham heh kaba pyniaid ia ka jingiadei hapdeng ki jylla bad ka ANTF ka dang tohkit ia ki jingiadei shakhmat bad shadien.
Ka ANTF ka la pan jingkyrshan na ki paidbah bad ka la ong ba yn buh rieh ia ka jingithuh ia ki nongpyntip bad yn ai ia ka khusnam kaba biang.
