Shillong, Jylliew 02 : Ka Meghalaya High Court kala shimkhia bha ia ka hukum ba pynmih da ka Khasi Hills Autonomous District Council (KHADC) ba ong ba u Syiem Khynnah (Deputy Syiem) Mansan Manik Syiem, “um long uba bit” ban shimti ia ka kam Acting Syiem ka Hima Mylliem namar ba u dei u para jong u Syiem ba shah sospon.
Haba shong bishar ia ka writ petition ha ka 1 tarik Jylliew, u Justice HS Thangkhiew ula pynsngew ba u nongmudui ula pynpaw iaka kam kaba sngew iahap bha ban tuklar da kane ka Iingkashari mynta hi” bad buh ia kane ka kam ban nang sngap shuh shuh ha ka 3 tarik Jylliew, 2026.
Ka mudui ka tynjuh pyrshah ia ka hukum jong ka Khasi Hills Autonomous District Council (KHADC) ba pynmih ha ka 22 tarik Jymmang, 2026.
U nongiasaid u nongmdui Philemon Nongbri, ula iasaid ba ka hukum ka dei kaba la “soi tang da u Executive Member marwei, kaba long pyrshah ia ka hukum 25 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007.”
Ula kdew ruh ba ka kyndon 9 jong ka Act, kaba ong ba “ka dei ka kamram jong u Syiem kat kum ka riti ka dustur ban jied napdeng ki para bala rangbah lane ki pyrsa jong u Syiem ban long u Syiem Khynnah ne Deputy Syiem”.
Ka bynta kaba lai ka long halor ka kyndon 8, kaba ong ba haba lai tylli ka shuki u Syiem namar ka jingshah sospon, “Ka Executive Committee ka lah da kaba pynmih ia ka hukum da ka jingthoh ba kan thung ia u Syiem Khynnah kum u Acting Syiem” ryngkat ka kyndon ba shah ban thung ia kino kini ki rangbah khasi na ka Kur Syiem Mylliem, “ha ka jingiasyllok lang bad ka Executive Durbar” lada ka dawa ka kam.
U Bah Philemon ula pynpaw ba ki nongshah mudui kila “iaid palat ia kaei kaba don ha ka ain” bad ka hukum bala tynjuh “naba ka dei kaba pynkhein ia ka Act, kane ka juh ka long kaba sniew hakhmat ka ain bad ka dei kaba hap ban kdat noh sharud”.
Haba mihkhmat ia ka KHADC, u Senior Advocate HL Shangreiso bala iarap da u T Dkhar, ula pynpaw ba “Kam long kaba shisha ba ka hukum ka dei kaba la mynjur da u Executive Member marwei, haba kdew ia ki mat jingiakren jong ka Executive Committee ba long ha ka 21 tarik Jymmang 2026.
U ong ba ka KHADC kala pyrkhat ia ka jingiadon jingiadei u nongmudui bad u Syiem ba shah sospon bad kane kala lam sha ka jingpynmih ia ka hukum. “Halor ka proviso jong ka kyndon 8(1), ula iasaid ba kam “long kaba hap ban leh hynrei kaba lah ban jied”.
U Justice Thangkhiew hadien ba shong bishar ia ki kot ki sla ula pynpaw “Haba pule ia ka hukum bala tynjuh kan pyni ba ka daw ba la kdew haka ban kyntait ia u nongmudui Syiem Khynnah ba u long uba biang ban thung kum u Acting Syiem ka dei namar ka jingshisha ba u dei u para trai jong u Syiem ba shah sospon”.
Ka Iingkashari ka bynrap “Shuh shuh kala pynpaw ba watla kane ka hukum ka mih na ki mat iakren jong ka jingialang ba 21 tarik Jymmang, ia kane ka juh (hukum) la soi tang da u Member marwei ha ka 22.05.2026”.
“Kaei kaba pynshon bha ia ka Iingkashari ha kane ka kam ka dei ka kyndon 9 jong ka Act, kaba buh da u pud ban pyrkhat na ka bynta ban thung ia u Syiem Khynnah napdeng ki para bala rangbah lane pyrsa jong u Acting Syiem” ong ka hukum.
“Kane ka kyndon namar kata ba ka don da u pud ban pyrkhat ia ki para bala rangbah lane pyrsa ba ki lah ban shah thung kum u Acting Syiem, ka daw bala pynpaw ha ka impugned order ka dei kaba hap ban shong bishar”.
Haba ailad ia ki nongshha mudui ban file affidavit bad baroh ki kot ki sla ba kin aiti lang, ka Iingkashari ka ong “yn pyrshang ban pynbeit noh ia kane ka kam ha ka sien shong bishar ban wan”.
 ba ong ba u Syiem Khynnah (Deputy Syiem) Mansan Manik Syiem, “um long uba bit” ban shimti ia ka kam Acting Syiem ka Hima Mylliem namar ba u dei u para jong u Syiem ba shah sospon.){kind=link}