Shillong, Jylliew 02: Ka Hynniewtrep Youth Development Council (HYDC) ka kyntu ïa u Myntri Rangbah ka Jylla Conrad K Sangma ban wanrah ïa ka Meghalaya Employment Policy bad ban pynrkhing ïa ka jingpyntreikam ïa ka MIIP-2024 da kaba kdew ïa ka jingduna ka jingiohkam ki samla trai Jylla bad ka jingpynkheiñ iaka aiñ Labour.
Da kaba kdew ba ka bynta kaba khraw jong ki lad iohkam ka wan na ki bynta jong ki kam shakri (Service Sector) ka HYDC ka la ong ba ka polisi ka dei ban kyntiew ki lad iohkam haki tnat Industries, Tourism, Healthcare, Education, Retail, Hospitality, Transport bad kiwei ki Service Sectors.
Haba iadei bad ka MIIP-2024, ka HYDC ka la pynpaw ïa ka jingduna jong ki lad ioh kam kiba lah ban ïoh da ki samla trai Jylla ha ki karkhana bad ka la dawa ban leh Audit ha baroh ki District daka ban jur iaka jingdonkam ban don ka jingiaid beit iaid ryntih katkum ki kyndon ai kam iaki trai Jylla bad ka jingpynmih ïa ki jingkheiñ jingdiah jong ka jingdon ki nongtrei trai Jylla bad nongtrei bar Jylla haki karkhana.
Ka HYDC ka la pynpaw ïa ka jingsngewkhia halor ka jingsiew, da kaba ong ba ki nongtrei kiba trei ha ki katto katne ki Petrol Pump kila ïathuh ba ki ïoh ïa ka jingsiew kaba kumba T.7,000 shibnai, kaba long kaba duna bha katkum ka Minimum Wage Rates.
Ka la dawa ban pyntreikam iaka Minimum Wage Rates bad ban dawa ka lad iaki nongtrei ban pynsngew iala ki jingeh ba ki kynduh haka ki jaka trei.
Haba kdew ia ki jinglap jong ka RTI haba iadei bad ki dukan ha MUDA, ka HYDC kala “Ki jingbym ïahap ki paw ba ki don hapdeng ki kyrteng jong ki nongïoh dukan ba dei trai Jylla hynrei ki ba shong dukan pat kim dei ki trai Jylla. Donkam ban leh Audit ha baroh kawei ka Jylla ba don ki jaka khaii jong ka MUDA”.
“Ka roi ka par ka dei ban thaw kam thaw jam, ki lad kamai, bad jingmyntoi ha ka ioh ka kot na ka bynta ki paidbah ka Meghalaya” la ong ka HYDC da kaba bynrap ba ki marpoh khyndew jong ka Jylla ha kaba kut ki dei ban pynkylla sha ka kam, ka jingseng kam seng jam, ka jingsiew kaba hok, bad ka jingpynbha ia ka jingim jong ki samla trai Jylla.
 ka kyntu ïa u Myntri Rangbah ka Jylla Conrad K Sangma ban wanrah ïa ka Meghalaya Employment Policy bad ban pynrkhing ïa ka jingpyntreikam ïa ka MIIP-2024 da kaba kdew ïa ka jingduna ka jingiohkam ki samla trai Jylla bad ka jingpynkheiñ iaka aiñ Labour.){kind=link}