Shillong, Nailar 05: Ka Meghalaya Energy Corporation Limited (MeECL) kala hukum ia baroh ki karkhana ba kin siew pynkhuid noh kham kloi ia ka bai bording ba pynsahteng lem kumta yn shu ot noh beit beit ia ka bording.
“Ka MeECL kala hukum ia baroh ki karkhana ba pynsahteng ia ka bai bording ba kin siew noh lem kumta kin ym ioh bording shuh” ong u Symbud Myntri Rangbah ka Jylla uba khmih ia ka Tnad bording Bah Prestone Tynsong.
Haba iakren bad ki nongthoh khubor hynne ka sngi thohdieng, u Bah Prestone ula iathuh baka MeECL kala pyrshang kat kaba lah ban ioh lum noh kham kloi ia ka bai bording ba pynsahteng la ka dei na ki karkhana ne na ki longiing.
Kane kala mih tang shisngi hadien ka kaiphod RTI ba sei madan ba haduh 58 tylli ki karkhana ha Umiam bad Byrnihat kila pynsahteng ban siew ia ka bai bording naduh u snem 2005 kaba la kot sha ka T. 44 klur.
U Chief Engineer ka Meghalaya Power Distribution Corporation Limited (MePDCL) ula pyntip baka T. 44.57 klur ka dei ka bai bording ba khlem siew da ki 36 tylli ki karkhana ha Umiam bad 22 tylli ki karkhana ha Byrnihat. Ka bai bording jong kiba na Umiam ka kot T. 2.45 klur katba jong kiba na Byrnihat ka kot T. 42.45 klur.
U Symbud Myntri Rangbah ula ong ba kine ki karkhana kin hap ruh ban siew ia ka kuna bad bynrap “ katba ki nang pynslem, katta kan nang heh ka sut”.
Haba pynpaw ba ka jingmap ia ka bai bording ba pynsahteng kam don satia, u Bah Prestone ula ong ba ka Tnad kala pyntreikam ia ka One Time Settlement ha u snem 2018-2019 hynrei kane ruh ka dei tang ka jingmap ia ka sut ym ia ka bai bording.
Haba kylli, u Bah Prestone ula iathuh ba ka MeECL kala dep ban ot bording ia ki katto katne ki karkhana ki bym shym la siew ia ka bai bording kat kum ka hukum.
