Shillong, Nailur 05: U Symbud Myntri Rangbah ka Jylla Bah Prestone Tynsong hynne ka sngi thohdieng, ula pynthikna ba ka Sorkar kala dep shim rai ban pyndam noh shisyndon ia ka Umngot Hydro Electric Project ba 210 Megawatt hadien ka jingpyrshah kaba jur na ki paidbah ka Ri-lum Khasi bad Jaintia.
“Kane ka project kala duh kala dam..ka jingbuhteng kam mih shuh namar ngi la dep ban pyndam ia ka. Haba ong ba ngi la pyndam ka mut ba kam don shuh ka Expression of Interest (EOI) jong kane ka Project, kaba mut ba kala kut syndon” ong u Bah Prestone.
U Symbud Myntri Rangbah ula kren ia kane halor ka jingdawa jong ka Joint Action Committee against Umngot Hydro Electric Project ban pynmih da ka jingthoh ia ka rai jong ka Sorkar Jylla.
“Ngan kren da kaba shai kdar ba ka JAC kala wan bad iakynduh ia nga. Kala ong balei ba ngim pyndonkam ia ka ktien pyndam bad khang noh hynrei nga la ong ba la pyndam bad ngi la pynkut ia ka. Lada phi iohi ba ka sorkar ka dang pynmih ia ka EOI, ka mut ba ka Sorkar ka dang thmu ban khot biang ia ki kompani ban iasoi MoU hynrei nga la kren shai ba ngim don jignthmu shuh ban pyntrei ia ka Umngot Project” ula ong.
Hynrei ha kawei pat ka liang, u Symbud Myntri Rangbah ula ong ba ym don pat ba lah ban batai ba kane ka project kan kut kan dam noh shirta.
“Kane ka long namar phim lah tip ba ka por kan sa poi ba ki briew hi hadien 50 snem mynta kin sa ong ba ngi donkam ia ka project. Mynta ngi la pyndam, ngi la pynkut hynrei phim lah ban tip, lehse ki briew ki pyrshah mynta hynrei ka pateng jong ki pat ioh ki kwah bad dawa ia ka Sorkar ban pynim ia ka project…phim lah ban batai lypa” ula ong.
