Kyntur ban wanrah ia ki Policy kat kum ka jinglong ki Jylla
Shillong, Jylliew 12 : U Myntri Rangbah ka Jylla Meghalaya Conrad K Sangma ha ka sngi Nyngkong, ula ban jur ba ka jing kiew ka ioh ka kot ka dei ban wanrah ia ka jingkylla kiba lah ban iohi ha ka jingim ki briew haba ai jingbatai ia ka lynti iaid ka Jylla ‘Transformation Journey 2032” ha ka jingialang ka NITI Aayog bad ki Myntri Rangbah ki Jylla ka thain Shatei Lam Mihngi.
Ha ka jingialang bala pynlong da ka NITI Aayog, u Conrad ula ban jur ia ka jingpyniasnoh hapdeng ka jingkiew bad ka roi ka par jong u briew.
“Ka jingkiew ka ioh ka kot ka dei ban wanrah ia roi ka par jong u briew kaba don jingmut” ula ong haba iasam ia ka thong jong ka Meghalaya ban pynurlong ia ka thong jong ka Viskit Meghalaya hapoh u 2032.
U Myntri Rangbah ula kren halor ka bynta jong ki project bala bei tyngka na shabar ri ha kaban tei ia ki jingtei kiba kongsan. “Ki Externally Aided Project kila shim ia ka bynta kaba kongsan bha ha kaban pynkha ia ki jingdon jingem kiba donkam bad pyntyllun sted ia ka roi ka par” ula pynpaw.
Haba wer ia ka jingiatreilang kaba khlain hapoh ka thain, u Conrad ula ong ba donkam ka jingiatreilang kaba khlain hapdeng ki Jylla ka thain Shatei Lam Mihngi ha ka khaii ka pateng, ka shalan mar shabar bad ka jingpynneh pynsah ia ka mariang.
Ula “ban jur ruh ia ka jingdonkam jong ki Policy kiba la shna kyrpang kat kum ka jingdonkam jong ka thain” haba kdew ia ka jingpher ha ka jinglong ki jaka bad ki jingdon ki nongshongshnong hapoh ka thain.
U Vice Chairperson ka NITI Aayog Ashok Lahiri, ki Dkhot, CEO bad Chief Secretary na baroh phra tylli ki Jylla— Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura — kila iashimbynta ha ka jingiakren.
Ka jingialang ka pynleit jingmut eh halor ki kam pynroi kiba donkam hakhmat eh, ki buit treikam ba thymmai bad ki jingeh ba iakynduh ha ka liang ka rep ka riang, ka koit ka khiah, ka pule dangle, ka jingpynroi sap, ka kam jngohkai bad ki jingtei.
Ki Myntri Rangbah jong kiwei ki Jylla ka thain Shatei Lam Mihngi kila pynsngew iala ki jong ki jong ki jingdonkam.
U Myntri Rangbah ka Arunachal Pema Khandu ula kren halor ka jinglah pynmih bording na ki wah bad ki prokram ka Sorkar kum ka ‘Sarkar Aapke Dwar’.
U Myntri Rangbah ka Assam Himanta Biswa Sarma ula ban jur ia ka jingpynbiang tarajur, ka roi ka par ba kynthup lang. U Myntri Rangbah ka Mizoram Lalduhoma ula kyrpad ban pynjynsur ia ki skhim ba bei tyngka ka Sorkar Pdeng.
U Myntri Rangbah ka Nagaland Neiphiu Rio ula kyntur ban pynbha ia ki surok bad pynioh ia ki iew na ka bynta ki mar ba pynmih na Nagaland kum u Coffee bad kiwei kiwei.
