Shillong, Jylliew 12: Ki nongshong shnong ka nongbah Shillong bad ki shnong ba marjan kin mad ia ka jingkyrduh um kaba 8 kynta ha kane ka sngi Nyngkong kata haka 15 tarik Jylliew namar ba don ka jingmaramot ia ka Greater Shillong Water Supply Scheme.
U Chief Engineer jong ka tnad Public Health Engineering, u la pynbna ban khang shwa ia katei ka skhim ha ka 15 tarik Jylliew naduh ka por 10 baje mynstep haduh ka por 6 baje janmiet na ka bynta ban bujli ia ki mashin tan um ha Stage-I bad Stage-II Pumping Station.
Ha kane ka por kan nym don ka jingsam um sha ka nongbah Shillong bad ki shnong ba marjan, la ong ka tnat PHE.
U Chief Engineer u la pynthikna ia ki paidbah ba yn buh hakhmat eh ia ka kam pynbha bad maramot iaka skhim. “Yn pyrshang katba lah ban pynioh biang bad ban sdang biang ka jingsam um sha ki paidbah ha ka por kaba kloi tam” u la ong.
Ka tnad ka la pynpaw ruh ka jingsngewsih halor ka jingthut ka rukom sam um.
Ki heh Sorkar ki la ai jingmut ia ki nongshong shnong ban buh lypa ia ka um kaba biang ban pyndap ia ki jingdonkam jong ki ha ka por ba thut ka jingsam um.
