Shillong, Jylliew 12: U Cabinet Secretary Dr TV Somanathan hynne ka Sngi Thohdieng ula khmih bniah ia ka jingpynkhreh ban pynlong biang ia ka eksamin NEET (re-examination) ha ka jingialang bad u Director General jongka National Testing Agency (NTA).
Ha katei ka jingialang khmih bniah, u Cabinet Secretary ula banjur ia ka jingdonkam ban pynthikna ba ka jingpynlong ia ka eksamin kan long kaba iaid beit, kaba khuid ba suba bad ba ka jingpynlong biang ia ka eksamin lyngba ka jingdon ia ka jingiatreilang kaba iajan bha bad baroh kiba donbynta lang ha katei ka kam.
Kane ka jingpynlong biang ia ka eksamin NEET kan long ha ka 21 tarik u Jylliew 2026.
U Cabinet Secretary ula pynpaw ba “Ka Sorkar Pdeng, ki Sorkar Jylla bad ki bor pyniaid District kila iatreilang ha ka rukom kaba iajan bha ban pynthikna ia ka jingiaid beit jong katei ka eksamin kaban pynlong biang. Ka bor kaba pura bad kaba khlain jong ka aiñ kan hap ha uno uno u briew uba pyrshang ha kano kano ka rukom ban pynthud, khanglad ne ban tuklar ia ka jingiaid beit iaid ryntih ha ka jingpynlong biang ia katei ka eksamin”.
U Somanathan ula khmih bniah ia ki jingpynkhreh bad baroh ki Secretary jong ka Sorkar Pdeng bad ki kynhun kiba donbynta ha ka 1 tarik u Jylliew 2026.
Hadien kane, ha ka 4 tarik u Jylliew 2026, ula lum ruh ia ka jingialang bad ki Chief Secretary jong ki Sorkar Jylla ban peit bniah ia ka jinglong jingman jong ka jingpynkhreh bad ia ka jingiaid ki kam ki jam halor jong katei ka jingpynbit pynbiang ia ki jingdonkam.
Kine ki jingialang kidei da ka jingthmu ban pynthikna ba kan don ka jingiatreilang kaba paka bha, ban pynkhlain pura ia ka jingpynkhreh bad ban pynneh ia ka jinglong kyrpang bad ka jingdon kyrdan jong ka jingpynlong biang ia ka eksamin NEET.
 ha ka jingialang bad u Director General jongka National Testing Agency (NTA).){kind=link}