Shillong, Lber 12: Ka Khasi Students’ Union (KSU) hynne ka sngi kala ioh bat haduh 90 ngut ki bar jylla na thain Umsning katba ki dang thmu ban leit trei bylla sha Ri-lum Jaintia.
Ka kyrwoh naka KSU Umsning circle ka iathuh ba kine ki bar jylla kila wan da 2 tylli ki Bos bad don ia u Nomber AS 01 GC 7338 bad AS 01 KC 5638.
Ki Dkhot ka KSU kila pan iaki kot ki sla na kine ki bar jylla bad shem ba kim donsatia iaki kot ki sla kiba biang, kaba pyni ba kila pynkhien iaka Inter-State Migrants Workmen (Regulations of Employment and Conditions of Service) Act, 2011.
Ka seng kala kynnoh ba kine ki bar jylla ki dei kiba thmu ban leit trei sha ki Coke Factory ha East Jaintia Hills District, kiba siew tang T. 4,000 sha ki ba ap ha khyrdop ba kin pyllait ia kine ki bar jylla.
Ka KSU man ka por ka la ju pynkynmaw sha ka sorkar ba la don kam da ki bor ba khlain ban tehlakam ia ka jing wan kyrthlep ki bar jylla sha Meghalaya.
Ka KSU ka la maham sha ki contractor ba ki dei ban pynbiang ia ki kot ki sla lada ki wanrah nongtrei na sha bar Meghalaya bad ban bud ryntih ia ka Inter-State Migrants Workmen (Regulations of Employment and Conditions of Service) Act, 2011.
Haba iadei bad kane ka jingioh bat ia ki bar jylla, ka KSU kala aiti noh ia kine ki bar jylla shaka Umsning Police station ban leh iaka ba donkam.
