Imphal, Jylliew : Ha ka jingpyrshang ban pynkut noh ia ka rep poppy ha ki jaka lum, u Myntri Rangbah (CM) ka Manipur u N.Biren Singh hynnin ka sngi u la plie ia ka skhim ka ba thymmai ba la tip kum ka ‘Cultivation of Horticulture Crops.’
U CM u la leit ruh lyngba ka Twitter na ka bynta ban pynbna ba la mang 4 klur tyngka na ka bynta ka jingpyntreikam ia kane ka skhim. U la ong ka long ka ba sngewkmen ban wanrah ia kane ka skhim bathymmai ba la tip kum ka “Cultivation of Horticulture crop,” ban ia bujli ha ka ba iadei bad ka jingrep ia u syntiew poppy ha ki jaka lum.
Kane ka skhim ka thmu na ka bynta ban aijingiarap pisa, ki mar rep bad ban iarap pyniaid iew na ka bynta ki nongrep ki ba pynmih ia kine kiwei pat ki jait mar rep. “T. 4 klur la mang lyngba kane ka skhim.Ha kine ki khyndiat snem ba la dep, ka jingrep ia u poppy ka la pynjulor ia haduh kumba 6600 akar ki jaka,” pynpaw une u myntri lyngba ka Twitter.U la ong ruh lyngba ka jingwanrah ia brand “MANIFRESH” yn lah ban pyniaid iew ia ki mar rep ki bym shym la ai dawai.
Shuh shuh u CM ka Manipur u la ong ruh ba na ka liang ka sorkar jong u ka la kut jingmut halor ka thma pyrshah ia u drok, bad ba kan ym don ka jingkylli halor ka jingphaidien pat ha ka jingialeh ban rat dyngkhong ia u drok na ka jylla.
