Guwahati, Jylliew : Ka tnat pule puthi ka Assam ka la pan jingshai sha ki 102 tylli ki skul ka jylla namar ka jingbym lah ban lehbha ha ka eksamin High School Leaving Certificate (HSLC) ka ba dang shu pynbna shen. Ka percentage ka jingdon jong baroh ki khynnah ki ba pass ia ka eksamin HSLC ka long 56.49 percent mynta ka snem, bad ka la hiar shibun ha ba ia nujor abd ka jingdon jong ki ba pass ha kane ka snem 2021 ka ba long haduh 93.10 percent, kata ha ka por ba ym shym la lah ban pynlong ia ki eksamin namar ka jingsaphriang jong ka khlad Covid-19.
Lah ruh ban kdew ba la pynbna ia ka result jong ka snem 2021 lyngba ka evaluation formula, kata da ka ba pynshong nongrim halor ka jinglah jong ki khynnah hapoh ki skul ki jong ki.Katkum ka tnat pule puthi baroh ki la don haduh 25 tylli ki skul ba la pyniaid da ka sorkar ha ka kylla ki bym shym la lah ban lehbha, ka ba pyni 0 percent ka jingmih ha kane ka eksamin HSLC/AMH mynta ka snem. Kumjuh ka percentage jong ki ba pass na ki 70 tylli ki skul ka la hiar hapoh ka 10 percent bad ka percentage ka jingpass jong ki 7 tylli ki skul ka long 10 percent.U Director ka Secondary Education kaMamata Hojai ka la ong ba ka percentage ka jingdon jong ki ba pass na ki 102 tylli ki skul ba la pyniaid da ka sorkar jylla ka long hapoh ka 10 percent.
“Na ki 102 tylli ki skul, 25 tylli ki skul ki la pyni ba ka jingpass ka long 0 percent.Ngi la pan ka jingpynshai na ki principal/headmaster jong ki 102 tylli ki skul.Ngi la kyntu ba kin phah da ka jingthoh hapoh ka hynniew sngi naduh ba ki la ioh pdiang ia ka shithi,” ong ka Mamata.
