Shillong, Naitung 15 : Ki kynhun bapher bapher ha Meghalaya kila mynjur ban iatreilang ha ka ban pynkhlain ia ka jingioh jingkoit na ka jingdih droks bad ban iarap pynrung biang ia ki briew kiba ngop ha u droks sha ka imlang sahlang.
Ka Care for India Reintegration project, ha ryngkat ka jingiatreilang bad ka DREAM Mission, kila pynlong ia ka jingiasyllok ha ka sngi Nyngkong kaba la ai kyrteng “Ki jingshemphang shaphang ka jingdih buaid: Ka jingpynkhlain biang ia ka jingialang.”
Ki nongmihkhmat na palat 20 tylli ki Seng Treimon sngewbha, ki kynhhun Niam, ki Rahabilitaton Centre bad ki Tnad Sorkar kila wan iashimbynta.
Ki jingiakren kala phaikhmat eh sha ki jingduna ha ka jingshimkhia ban khmih lang hadien ba dep ki jingai jingsumar, ka jingphah sumar sha ki jaka ai jingsumar (referral), ka jingkyrshan ha ka liang ka kamai kajih. Ki Nongkren ki kynthup ia ka Dr Jasmine Mary Lyngdoh, Bah Francis Kharshiing, bad Rev EC Marwein kiba la ban jur ia ka jingdonkam ban pynkhlain ia ka jingiatreilang khnang ba ki briew (nongdih droks) kin nym duh ia ka jingkyrshan hadien ba kila pyndep ia ki jingshah sumar.
Kum ka jingmih, ki nongiashimbynta kila rai ban thaw ia ka Joint Forum ban pynkhlain ia ka jingiatreilang hapdeng ki agency bapher bapher.
Ka Care For India kan pyniaid ia ka forum na ka bynta shisnem, bad ia ka jingialang ba bud yn sa pynlong da ka New Hope De-addiction Centre ha u bnai Risaw.
U Bob Jacob jong ka Care for India ula ong ba ka jingkoit ka dei ban ioh ia ka jingkyrshan da ka imlang sahlang ban pynthikna ia ka burom bad ka jingthmu na ka bynta kito kiba tei pat iala ka jingim.
