Shillong Nailar 29: U Chief Secretary ka jylla u Bah Donald Phillip Wahlang hynne ka sngi u la ong, ba ka jylla kadei ban sdang pyntreikam iaka Scholarship Programme ne ka jingai bai bam ia ki nongialehkai kiba don iaka jingthrang ban kiew shaphrang ha ka kam ialehkai.
“Nga kyntu ia ka tnad Sports & Youth Affairs, ba ha ki snem ban wan, kan ialeh ban sdang pyntreikam ia ka Scholarship Programme na ka bynta ki khynnah kiba kwah ban kiew shaphrang ha ki kam ialehkai” ong u Chief Secretary haba kren kum u kongsan ha ka jingrakhe ia ka National Sports Day kaba la pynlong daka tnad Sports & Youth Affairs, hynne ka sngi ha Soso Tham Auditorium, Shillong.
“Ha ka National Level kala don lypa ka National Talent Search ha ka kam ialehkai, kumta ha ka jylla ruh dei ban don iaka prokram ban pynshlur ia kiba thrang ban ialehkai, namar kam long kaba suk ia ki iing ki sem ban aiti lut ne ban pynlut ha ka kam ialehkai” ong u Bah DP Wahlang.
Une u Khliehduh ki Ophisar ula ong ba ka jylla kala iaid shakhmat bad ka Talent Identification Scheme ia kaba la pyniaid da ka kynhun shimet kaba don ia ki nongialehkai kiba paw bad kane ka jingwad ia ki nongialehkai kiba don sap la leh ha ka rukom kaba biang bha bad ngeit skhem ba kan ialam sha kaba bha eh, ha ki snem ban wan, ban pynmih iaki nongialehkai ha ka jylla.
U Chief Secretary ula ai jingmut ruh ba ki nongialehkai kiba ialehkai ha ki jingialehkai da ka kynhun kum ka Football bad kiwei kiwei kidei ban don iaka Group Insurance Scheme khnang ba lada jia ba ki nongialehkai ki kum mynsaw kin lah ban ioh jingiarap.
U la iaroh iaka tnad Sports & Youth Affairs kaba la pynlong ia kane ka prokram ban ai jingithuh ia ka jingtrei shitom jongki nongialehkai kiba la jop ia ki jingiakob ha ka rynsan International, National bad Regional da kaba ai khusnam da ka song tyngka ia ki.
U Bah Wahlang u la ong, ka jylla kan pynlong iaka North East Olympic Games ha u bnai Risaw mynta u snem bad u la kyntu ia ki nongialehkai kiba la ioh khusnam, ba kidei ban bteng ban trei shitom bad ialehkai bha shuh shuh ban pynthikna ba ka jylla Meghalaya kan ioh khur bun duh ki takma ha katei ka lympung iakob.
Ha kaba iadei bad ka jingshna ia ki jingtei bapher na ka bynta ka jingpynkhreh iaka National Games, u la ong, dei ban plan lypa ban don ia ki Sports Academy bad Sports Hostel ha ki jingialehkai bapher bad dei ban iasyllok bad ki riewshemphang ha ka jingtei ia kitei ki jaka ba kin long ki paka.
Haba phai sha ka jingrakhe iaka National Sports Day kum shi bynta ban kynmaw burom ia u khlur ialehkai Hockey jong ka ri u Major Dhyanchand, ka tnad Sports & Youth Affairs kala sam khusnam sha ki nongialehkai kiba la wanrah nam bad burom ia ka jylla ha ki jingialehkai ki bapher bapher da kaba ai khusnam da ka pisa ia kitei ki nongialehkai ka jylla.
Nalor kane, u Chief Secretary ryngkat bad ki heh ophisar IAS ka jylla, ki nongkitkam ka Meghalaya State Olympic Association (MSOA) kila kitbok kitrwiang ruh ia ki 3 tylli ki kynhun kiban mih naka jylla ban leit ialehkai ha ka Subroto Mukherjee Cup International Football Tournament kaban long ha New Delhi.
