Shillong, Risaw 31: U Myntri Rangbah ka jylla u Conrad K Sangma ula ban jur ia ka jingdonkam ban iatreilang hapdeng ka sorkar bad ki bor shnong ban shimkhia ia ki jingeh kiba mad ha ki jaka sor.
“Ka jingthmu jong kane ka jingialang kam dei tang ban shu kdew ia kiei ki bym shim la treikam, hynrei ban kylli ia kaei kaba ngi lah ban ialehlang ban pynlong ia kaba bha. Haba ka shnong ka thaw, ka sorkar, ki ophisar bad ki nongialam seng sain pyrthei ki ia wan lang hajuh, kan ym don kaei kaei ruh kaba yn ym lah ban pynurlong” ula ong haba kren ha ka jingialang iasyllok bad ki Rangbah Shnong bad ki nongialam ha ki shnong kiba hap hapoh jongka Greater Shillong Planning Area kaba la long hynne ka sngi Thohdieng ha State Convention Centre.
Ha katei ka jingialang, la plie ruh ia ka jingsdang ia ka Mission Clean Shillong 2027 kaba dei ka sienjam da ka jingthmu ban pynlong ia ka Shillong kum kawei na ki jaka kaba khuid bad ka nongbah kaba pynneh pynsah ha ka thain shatei lam mihngi lyngba ka jingpynbha ia ka rukom lum ia ki niut, ka jingiahsimbynta lang ki shnong ki thaw bad ka jingiatrei ryngkat lang hapdeng ki bor shnong bad ki khlieh nongsynshar.
Ka mishon ka pynleit jingmut ban pynlong ia ki shnong kiba khuid, ban kynjoh ia ka 100 percent ka Waste Processing, ban weng ia ki niut kiba la sahteng hapoh ka jak alum niut ha Marten bad ban sdang pyntreikam ia ka jingkhmih bniah da ka jingpyndonkam ia ki kor ki bor.. Kan kyntiew ruh ia ki nongshong shnong ban ialam ia ki jingpynkhuid ia ki shnong bad ka jingdon ia ka jingkitkhlieh ha kaban iashimbynta ha kaban pynkhlain ia ka khuid ka suba.
U Myntri Rangbah ula pynpaw ba ka jingiakynduh lang kaba man la ka por bad ki nongialam shnong ka pyni ia ka jingthmu jong ka sorkar ban don ia ka jingiatreilang bad ki sienjam kiban shim kiban long na ka bynta ka shnong ka thaw.
“Ngim lah ban long kiba biang pura lut hynrei ngi la pyrshang tyngeh pat. Namar ka jingtuklar lem ka jong phi, kiba bun kiei kiei kila sdang ban bha, naduh na ka jingdon ia ki jaka pynbiang ia ka umbam umdih, ki jaka bret niut, ka jingpynbiang ia ka bording elektrik bad ka rukom lum ia ki niut ki nier, hynrei ki dang bun pat kiei kiei kiba hap ban dang leh” ula ong.
U Myntri Rangbah ula pynshai ruh ia ki sienjam kiba la shim da ka sorkar, kaba kynthup ia ka jingpyndait ia ki CCTV, ka jingbuh ia ki street light ne post elektrik, ka jingpynkhuid ia ki nala bad ka jingpynitynnad ia ka nongbah. Ula kyntu ban don ia ka rukom treikam bad ka jingpynitynnad bad ka jingsumar sukher kan long ka kam kaba leh man la ka por bad kan ym dei shuh kaba shul eh tang shisien. Ula pynbna shuh shuh ba ka jingiakren yn sa pynlong biang ban iakren halor ki ar tylli ki mat kiba kongsan kaba kynthup ia ka jingpynkhuid ia ki wah bad ban iakhun pyrshah ia u droks ban pynthikna ba dei ban mih ka jingseisoh ha ki bnai ban wan.
“To ngin ia bteng ban ia trei kum ka kynhun ban pynlong ia ka Shillong kaba khuid, jyrngam bad ka nongbah kaba khie im bha” ula bynrap.
Ha katei ka jingialang, ki heh ophisar na ka Tnad Urban Affairs kila pynlong ia ka jinglong jingman baroh kaba la leh hapoh jongka Clean Shillong Mission, kaba la sdang ha u Naitung 2025. Ka Tnad kala pyntip ba kala don ka jingkiew da 50 percent ha ka jingdon ki nongtrei ha khuid ka suba, ka jingling ryntih ha ka jingpynkhuid ia ki nala bad ka jingtreikam bha ha ka rukom lum ia ki niut ki nier. La jan kumba shiteng na ka 3.5 lak metric ton u niut uba la don ha Marten la dep ban tylliat lyngba ka bio-mining bad la pyndonkam ruh ia ki niut ki nier kum ki sboh thung jingthung lyngba ka jingiatreilang bad ka tnad ka rep ka riang.
Ki ophisar kila batai ruh shaphang ka jingiaid shakhmat ki kam banpynkhie im iaki wah, ki jaka ieng kali kiba thymmai, ka projek pynkynriah ia ki nongdie madan bad ki jaka pynieng ryntih ia ki kali ha kylleng ki shnong ki thaw.
La pyllait ia ka pisa sha ki 14 tylli ki shnong ban kyntiew ia ki projek kiba iadei bad ka jingpynitynnad bad pynbhabriew bad ka jingiashimbynta ki nongshong shnong.
U Myntri Rangbah ula sam ruh ia ki cheque sha kitei ki 14 tylli ki shnong bad pynshlur ia ki ban shim ia ki sienjam kum ka jingbro ia ki dur ha ki kynroh bad ka jingairong airup ban pynitynnad shuh shuh ia ka nongbah Shillong.
Kala don ruh ka jingiakren hapdeng u Myntri Rangbah bad ki Rangbah Shnong kaba la long kum ka rynsan ban iakren ha kaba iadei bad ki jingtei, ka jingkhuid jingsuba, ka jingshngain bad ka rukom synshar khaddar ha ki jak asor.
U Myntri Rangbah ula pynbna ba ha ka wat kaba nyngkong jong ka jingpyndait ia ki CCTV ka nkynthup ia ki 48 tylli ki shnong ha kaba yn pyndiat 250 tylli ki camera bad ia kane yn pyndep hapoh ka taiew ba kut jong u Naiwieng. Ka Shillong Municipal Board kan long kum ka kynhun kaban khmih bad sumar ia ki CCTV bad ia ki Street Light bad yn pyntyllun shakhmat ia ki prokram ban buh ia ki Street Light ban kyntiew ia ka jingkynthup ha kylleng ki lad bad ki shnong ki thaw.
Ula bthah ruh ban don ia ka jingryntih ha ka jingpynkhuid ia ki nala khnang ban lait na ka jingshlei um bad ban kyntiew ia ka khuid ka suba ha kaba kine ki jingpyrshang kin iaid ryngkat bad ka jingpynkhreh ia ka National Games 2027. Ki jaka kiba jur ki kam sinew un buh hakhmat eh ban kyntiew ha ki liang ki bapher bapher kaba kynthup ia ka jingbuh ia ki post elektrik, CCTV bad ki lynti iaid kjat.
Kiwei pat ki mat kiba la iakren kadei halor ka jingpyniar ia ki Village Defense Party (VDP) ki prokram kiba iadei bad ki Volunteer ban pynkhlain ia ka jingpahara ha ki shnong ban iakhun ia ka jingkynrei u droks, ban pyniaid ia ki kali ban pynduna ia ka jingkhapngiah bad ki projek pynitynnad kiban dang wan. Ka jingpynbiang ia ki painkhana na ka bynta ki paidbah bad ka jingiatreilang lyngba ka projek jongka CSR kan dei kaba la buh hakhmat ha ki jaka khaii pateng kiba kongsan bha.
Ha kane ka jingialang la wan ban iashimbynta lang u Symbud Myntri Rangbah ka jylla u Bah Sniawbhalang Dhar, u Chief Secretary u Dr. Shakil Ahammed, u Commissioner and Secretary Dr Vijay Kumar D ryngkat bad ki heh ophisar na ka tnad Urban Affairs, Shillong Municipal Board (SMB) bad ka Meghalaya Urban Development Authority (MUDA).
