Agartala, April 18:Ka sorkar Tripura hynnin ka sngi Nyngkong ka la pynbna ban khang khyrdep ia baroh ki skul ha ka jylla naduh ka 18 haduh ka 24 tarik mynta u bnai namar ka jingsyllad borbah jong ka jingshit kyrang.
Lyngba ka Facebook post, u Myntri Rangbah (CM) ka Tripura u Manik Saha ula ong ba namar ka jingsyllad borbah jong ka jingshit ha baroh kawei ka jylla, kumta ruh kane ka ktah jur ha kaba iadei bad ka koit ka khiah jong ki khynnah skul.
“Nalor kata la kyntu ruh ia baroh ki bor pyniaid jong ki skul shimet ha ka jylla ba kin khang khyrdep ia ki skul ha kaba kum kane ka por,” ong shuh shuh u CM.
Ka jingshit jong ka mariang ha ka por mynsngi ha ka jylla ka la nangkiew mynta u taiew.Kane ka jingshit kyrang ha ka jylla kan dang iai bteng na ka bynta kine ki san sngi ki ban dang wan.
Ki tyllong khubor na ka tnat Meteorological Department (IMD), ka India ha Agartala ki la ong ba kane ka jingshit kyrang ka la kynjoh sha ka palat 39 degree bad kan kot ruh shaduh ka 40 degree Celsius.
Ka jingshit ha ka mariang ha kane ka sngi U Blei ba la lah ka long haduh 38.9 degree bad kaba kum kane ka jinglong ha ka mariang kan dang iai bteng na ka bynta kine ki san sngi ki ban dang wan.
