Shillong, Iaiong 18: U kyrtong ka United Democratic Party (UDP) bah Synshar Kupar Roy hynne ka sngi ula wan ban thep kyrteng kum u kyrtong ban iakhun iaka ilekshon shiteng samoi na Sohiong constituency ka ban long haka 10 tarik Jymmang 2023.
Ha shuwa ban wan thep kyrteng ha ophis Deputy Commissioner (DC) East Khasi Hills, ia u bah Synshar la wan synran lang da u president ka UDP bah Metbah Lyngdoh, bah Paul Lyngdoh, bah Renikton Lyngdoh Tongkhar lem bad ki nongkyrshan.
Haba kren sha lad pathai khubor, u bah Synshar ula ong ba u ieng ban iakhun ia kane ka ilekshon haka nongrim jong u bah HDR Lyngdoh (Bam Kwai Dwar U Blei) bad dei namar kane u don ka jingkyrmen ba ki paidbah ka thain Sohiong ruh kin ai ka jingkyrshan bad ka jingjop don burom ha kane ka ilekshon ban wan.
U bah Synshar ula ong ba um kwah ban kren eiei halor ki kam jong u MLA barim ka Sohiong konstitwensi hynrei un iai buddien iaki kam ba u bah HDR Lyngdoh (Bam Kwai Dwar U Blei) ula prat lynti.
“Nga kyrmen ba ki paidbah kin ai ka jingjop ia nga ha kane ka ilekshon ban wan namar baroh ki tip ba ka lah dei ka por ban jied ia u nongthaw ain u ban kren iaki mat ba ktah iaki paidbah bad iaka jylla hapoh ka ing dorbar” la ong u bah Synshar.
U bah Synshar ula ong ba kum u rangbah ba ki paidbah ka Sohiong kila ibit ia u ban mih bujli haka jaka u bah HDR Lyngdoh (Bam Kwai Dwar U Blei), un trei shitom bad un iai buddien iaki kam ki ban wanrah ka jingmyntoi iaka konstitwensi bad ka jylla baroh kawei.
