Shillong, Nailur 23 : Ka Myntri ka Koit ka Khiah Kong Ampareen Lyngdoh ha ka sngi Nyngkong, kala kyntait war ia ki jing kynnoh ba dei ka jingkhein sting jong ki bor pyniaid ka Nongpoh Civil Hospital, halor ka jingiap I Khunlung ba kha da ka Kmie ha painkhana jong ka hospital.
Haba kren sha ki lad pathai khubor, ka Myntri kala pyntip “Mar syn ioh ia ka khubor ka jingiap ine I Khunlung, ka kam ba nyngkong ba nga leh ka long ka jingthung ia u Ophisar ha ka kyrdan Joint Director ba un lum ia ki jingtip ba kongsan bad ban batai ha nga ia kaei kaba jia”.
“Ka Kmie kaba dei na Umdem, ka dei kaba la sumar shuwa ha Umden Primary Health Centre. Namar ba kam da khlain bad ba kala pun ia I khunlung haduh 19 taiew, kaba long hapoh 5 bnai- kumta la wan pynkut noh sha Nongbah Civil Hospital” kala bynrap.
Ka Myntri kala pynshai ba ka jingtohkit kala iaid ruh halor ka jingkam ba kam don ambulance ha Umden PHC bad bynrap “Nga dang ap ia ka kaiphod halor kane”.
Kane ka nongpang kala poiha Nongpoh Civil Hospital ha ka por 3 baje mynstep bad la khmih ia ka da ki arngut ki doktor ba don ha ka kam kyntup ka doktor Gynecologist. “ Ki doktor kila khmih ia ka bad hadien kala leit sha painkhana bad la synran ia ka da u Kurim.
Hynrei sngewsih, kala mad ia ka jinghap noh I khunlung ha kane ka por” ong ka Myntri.
Ka Myntri ka pynpaw ia ka jingsngewsih sha kane ka longiing hynrei kala ban jur ba kane ka jingjia baroh kala jia ym namar ka jingkhein sting jong ki nongsumar. “I khunlung I dang hapoh ka san bnai, ki doktor kila ai ia ka jingsumar kaba donkam. Ngi sngewlem ia ka jingduh jong kane ka longiing hynrei kam long pat kaba dei ban kynnoh ba kane ka jia na ka jingkhein sting”.
Ka Myntri kala pynpaw ruh ia ka jingsngewkhia halor ka rukom pynmih ki lad pathai khubor ia ka khubor halor kane ka jingjia bad ong “Ka long kaba sngewsih ba ka khubor kaba mih ka dei kaba la shu pynheh, kaba lam sha ka jingpyn sngew thuh bakla”.
Haba kylli, ka Myntri ka pyntip ba ka Fact Finding Committee jong ka Tnad kala leit sha Nongpoh Civil Hospital bad kala lum ia ki jingtip kiba donkam. U Medical Superintendent un sa ai ia ki jubab halor ki jingkynnoh bapher bapher ha kine ki khyndiat sngi ban wan”.
